ဆီထမင်းနဲ့အကြော်စုံ ပူပူလေး (မန္တလေး ပဲကြော်ရယ်၊ ကုလားဘယာကြော်ရယ်၊ တိုပူးကြော်ရယ်၊ ဘူးသီးကြော်ရယ်)
ပဲပြုတ်ကို အပေါ်ကနေ ဖြူးဖို့ မေ့နေလို့ နောက်တစ်ပုံ ထပ်ရိုက်လိုက်တယ်။
ဆီထမင်းနဲ့ တစ်ခြားအကြော်တွေ မရခင် မန္တလေးပဲကြော်ကို အရင်ကြော်ပြီး စားလိုက်ပါတယ်။ (ရေနွေးကြမ်းတစ်ခွက် နဲ့ ကော်ဖီတစ်ခွက်ကို နှစ်ယောက်သား မျှပြီးသောက်ကြတယ်။)
မန္တလေးပဲကြော်အတွက် ဒီ Red Kidney Beans ပဲဗူးကို သုံးပါတယ်။ ပဲပြုတ်စရာလဲ မလိုတော့ဘူးပေါ့။
Red Kidney Beans ပဲဗူးကို ကောက်ညှင်းမှုန့်နဲ့ ရောပြီးနယ်ထားတဲ့ပုံ
ဆီထမင်းအတွက် လိုအပ်သောအရာ
ကောက်ညှင်းဆန် အဖြူ ၄ လုံး (ထမင်းအိုးမှာ ပါတဲ့ ခွက်နဲ့ ချိန်ပြီးချက်လိုက်ပါတယ်။)
ကြက်သွန်နီ ၁ လုံး ပါးပါးလှီး၊ ကြက်သွန်ဖြူ ၅ မွှာ (ခေါ်) ၅ တက် ထောင်းထား
ဆီ
ဆနွင်း
ဆား
ဆီထမင်း ထိုးနည်း
ကောက်ညှင်းဆန် ၄ လုံးကို ရေဆေးပြီး ရေစစ်ထားလိုက်ပါ။ ဆီထမင်းထိုးမယ့် အကြော်အိုးကို မီးဖိုပေါ်တင်ပါ။ ဆီအနည်းငယ်ထည့်ပါ။ ဆီကျက်လာရင် ပါးပါးလှီးထားတဲ့ ကြက်သွန်နီ နဲ့ ထောင်းထားတဲ့ ကြက်သွန်ဖြူကို အရင်ကြော်လိုက်ပါ။ ကြက်သွန်ဖြူနီ အရောင် အနီရောင်ဖြစ်လာရင် ဆနွင်းမှုန့်ထည့်လိုက်ပါ။ ဆနွင်းမှုန့်ထည့်ပြီး ၁ မိနစ်လောက်ကြာလာရင် ရေဆေးထားတဲ့ ကောက်ညှင်းဆန်ကိုထည့်ပါ။ ဆီကျက်နဲ့ ခဏလုံးလိုက်ပါ။ ပြီးရင် ရေထည့်ပါ။ ရေကိုတော့ ထမင်းအိုးမှာပါတဲ့ခွက်နဲ့ချိန်ထည့်ပါတယ်။ ကောက်ညှင်းဆန် တစ်လုံး ၊ ရေ တစ်လုံးခွဲထည့်ပါတယ်။ (ကောက်ညှင်းဆန် တစ်ဆ၊ ရေတစ်ဆခွဲ) ပြီးရင် အကြော်အိုးကို အဖုံးအုပ်ပြီး မီးဖြည်းဖြည်းနဲ့ ၁၀ မိနစ်လောက်အုပ်ထားပေးပါ။ ၁၀ မိနစ်လောက်ကြာပြီးသွားရင် ကောက်ညှင်းကို အပေါ်အောက် လှန်ပေးပါ။ ပြီးရင် ၅ မိနစ်လောက်ထားပါ။ အဲ ............... ဆီထမင်းကျွတ်ကျွတ်လေး စားချင်ရင်တော့ မီးဖြည်းဖြည်းနဲ့ ၁၅ မိနစ်လောက်ထားပေးပါ။ ဒါဆိုရင်တော့ ဆီထမင်း ၀ါဝါ၀င်းဝင်းလေး ရပါပြီရှင်။
-------------------
မန္တလေးပဲ ကြော်အတွက်လိုအပ်သောအရာ
Red Kidney Beans ၂ ဗူး
ကောက်ညှင်းဆန်မှုန့် ၄ ဗူး (ထမင်းအိုးမှာ ပါတဲ့ ခွက်နဲ့ ချိန်ပြီးချက်လိုက်ပါတယ်။)
ဂျင်း လက်နှစ်ဆစ် ထောင်း
ကြက်သွန်ဖြူ ၇ တက် ထောင်း
ဆား
ဆော်တာမှုန့် (မရှိလဲ မထည့်လဲ ရပါတယ်နော်)
မန္တလေးပဲကြော်နည်း
Red Kidney Beans ၂ ဗူးကို အဖုံးပေါက်ပြီး ဇလုံတစ်ခုထဲသို့ ထည့်လိုက်ပါတယ်။ (ပဲဗူးမှာ ပါတဲ့အရည်တွေပါထည့်လိုက်ပါတယ်။) အရင်ဆုံး ပဲတွေကျေသွားအောင် နယ်လိုက်ပါ။ နယ်လို့ပြီးရင်ကောက်ညှင်းဆန်မှုန့် ၄ ဗူးကိုထည့်၊ ထောင်းထားတဲ့ ဂျင်း နဲ့ ကြက်သွန်ဖြူကို ထည့်၊ ဆော်တာမှုန့် နည်းနည်းလေးပဲထည့် (လက်မ နဲ့ လက်ညိုးနဲ့ကော်လိုက် ပါလာတဲ့ ဆော်တာမှုန့်ပဲ ထည့်ပါတယ်။ ချိန်လို့ ရအောင်ပြောတာပါ။ အဆင်ပြေသလိုသာထည့်ပါနော်။) နယ်ပြီးရင် ဆားလေး ဘာလေး အရင်မြည်းကြည့်ပါလား။ ပဲဗူးမှာလည်း နဂိုကတည်းက ဆားပါပြီးသားမို့လို့ပါ။ အငန်ကြိုက်သူများကတော့ ဆားနည်းနည်းထပ်ထည့်ပါ။ အငန်မကြိုက်သူများကတော့ ဆားထပ်ထည့်စရာ လိုတော့ဘူး။ ဒါဆိုရင်တော့ မန္တလေးပဲကြော် ကြော်ရန် အဆင်သင့်ဖြစ်ပါပြီ။ ကြော်မယ့်အိုးထဲသို့ ဆီ နည်းနည်းထည့်ပြီး တည်လိုက်ပါ။ ဆီကျက်လာရင် မိမိစိတ်တိုင်းကျ မန္တလေးပဲကြော်ကို ပြားပြီး ကြော်ပါလေ။ ဒါဆိုရင်တော့ မန္တလေးပဲကြော် မွှေးမွှေးလေးရပါပြီရှင်။
---------------
တိုပူးကြော် အတွက်လိုအပ်သောအရာ
တိုပူးမှုန့် (စိန်ဖြိုး တံဆိပ် တိုပူးမှုန့်ကို ကျိုပါတယ်။ ဒါမှ ရှမ်းတိုပူးကြော်နဲ့ တူတာပါ။ စိန်ဖြိုးတံဆိပ် မရှိလဲ ရှိတာနဲ့ကျိုပါနော်)
ဆား
တိုပူးကျိုနည်း နဲ့ ကြော်နည်း
ဇလုံ တစ်ခုထဲသို့ တိုပူးမှုန့်တစ်ဆ ရေတစ်ဆခွဲထည့်ပါ။ တိုပူးမှုန့်ထည့်တဲ့အပေါ်မူတည်ပြီး ရေထည့်ပေးပါ။ ပြီးရင် ဆားနည်းနည်းထည့်ပါ။ ပြီးရင် တိုပူးမှုန့်များ ကျေသွားအောင်အထိ မွှေပေးပါ (သို့) နယ်ပေးပါ။ တိုပူမှုန့်ကျေညှက်သွားအောင်အထိနယ်ပေးပါနော်။ ပြီးရင် ကော်ဖီ ဇကာစစ်နဲ့ စစ်လိုက်ပါတယ်။ အမှုန်ပါတယ် တိုပူးမှုန့် မကျေညှက်တာတွေ ဖယ်လို့ ရအောင်ပါ။ ပြီးရင် ၃၀ မိနစ်လောက်အဖုံးအုပ်ပြီး ထားထားပေးပါ။ တိုပူးမှုန့် အနည်ထိုင်သွားအောင်ပါ။ တိုပူးမှုန့်အနည်ထိုင်သွားရင်တော့ ကျိုမယ့်အိုးထဲသို့ တိုပူးမှုန့် အရည်ကြည်ပဲ အရင်ကျိုပေးပါ။ တိုပူးကျိုနေတုံးတော့ အဆက်မပြတ် မွှေပေးပါ။ မီးတူးသွားမှာစိုးလို့ပါ။ တိုပူးအရည်ကြည်ဆူပွက်လာအောင်အထိကျိုပေးပါ။ ဆူပွက်လာရင် တိုပူအနည်ထိုင်နေ့တဲ့ အရည်ပျစ်ပျစ်ကိုထည့်ပေးပါ။ အဆက်မပြတ်တာမွှေပါ။ ဗွက်ဗွက်ဆူလာအောင်အထိ တည်ပေးပါ။ ဗွက်ဗွက်ဆူပြီး မွှေရတာ ခက်လာရင်တော့ တိုပူးအအေးခံမယ့် ခွက်ထဲသို့ထည့်ထားပေးပါ။ နောက် တစ်နာရီလောက် ကြာရင်တော့ တိုပူးတုံး ရပါပြီရှင်။ ပြီးရင် မိမိစိတ်တိုင်းကျ အတုံးတုံးပြီး ကြော်စားနိုင်ပါပြီရှင်။
-------------------
ကုလားဘယာကြော် အတွက်လိုအပ်သောအရာ
ကုလားပဲ ၂ ဗူး
ပြင်းတော်သိမ်ရွက်
ငရုတ်သီးစိမ်း (မိမိလိုသလောက်ထည့်)
ကြက်သွန်နီ ၂ လုံး
ဆော်တာမှုန့်
ဆား
အချိုမှုန့်
ကုလားဘယာကြော် ကြော်နည်း
ဒီနေ့လို ကုလားပဲကိုကြော်မယ်ဆိုရင် မနေ့ညကတည်းက ကုလားပဲကို ရေစိမ်ထားပါ။ (ကြာကြာစိမ်ထားတော့ ကုလားပဲထောင်းရတာ သက်သာတယ်လေ။ မဟုတ်လဲ ကျိတ်စက်နဲ့ ကျိတ်လဲ ရတာပါပဲ။) စိမ်ထားတဲ့ ကုလားပဲကိုထောင်းပါ။ ကြက်သွန်နီကို ပါးပါးနုတ်နုတ်လှီးထားပါ။ ကြက်သွန်နီက မထည့်လဲ ရပါတယ်။ ပိုပြီးချိုသွားအောင် ထည့်လိုက်တာပါ။ ငရုတ်သီးစိမ်းကို ပါးပါးလှီးပြီးထည့်၊ ပြင်းတော်သိမ်ရွက်လည်း ပါးပါးလှီးပြီးထည့်၊ ဆော်တာမှုန့်နည်းနည်းထည့်၊ ဆားထည့်၊ အချိုမှုန့်ထည့်ပြီး နယ်ပေးပါ။ ပြီးရင်တော့ ဆီအိုတည်ပြီး ကြော်စားနိုင်ပါပြီရှင်။ ကုလားဘယာကြော် မွှေးမွှေးစပ်စပ်လေး ရပါပြီနော်။
မှက်ချက်။ ။ အဲနေ့က တစ်နေကုန် ထမင်းမချက်ဘဲ ဆီထမင်းနဲ့ အကြော်စုံပဲ စားပါသည်။
ကျန်းမာချမ်းသာ ကြပါစေရှင်။
11 comments:
အဟား
မီးမီးကြိုက်ကြိုက်တွေချည်းဘဲကွယ်။ ကိုယ်တော်ကြီးအတွက်ဖယ်ထားခဲ့ပြီး ကျန်တာ မသွားပါတယ်။
ဒီလိုငတ်တာ
အဲလေ
ဒီလိုကြိုက်တာ
ဟယ်စားချင်လိုက်တာ...္တမန္တလေးပဲကြော်နဲ့ဆီထမင်းလေးနဲ့ ရေနွေးကြမ်းနဲ့ (နှိပ်စက်တယ်)
တနေကုန် ဆီထမင်းပဲ စားနေတော့ ဗိုက်မနာဘူးလား...
းဝ)
မန်းလေးပဲကြော်၊ လုပ်စားဦးမယ်။ တို့ဟူးလည်းကိုယ်တိုင်ကျို ဦးမယ်။ ကျေးဇူးနော် မမိုးး)
နွေးနေခြည်
များလှချည်လားနော်..တော်တော်လက်ဝင်မယ်..
ပဲကြော်လုပ်စားကြည့်အုံးမယ်..စားချင်နေတာ..
မလုပ်တတ်လို့ရယ်.. ဘာပွဲတုန်း...း)
ကျောကျော
မီးမီးအကြိုက်တွေချည်း လုပ်ထားတာ။
မမ rose of sharon
အားပါးတရ စားသွားတယ်ဟုတ်
ကိုလူထွေးရေ
အဲနေ့က ဆီထမင်းလေး စားလိုက် ဦးချိန်တီစားလိုက်နဲ့ ဟုတ်နေတာ
ညီမနွေးနေခြည်
လုပ်စားရင် လက်တို့လိုက်အုံးနော်
ကူးကူးရေ
ဘာပွဲမှ မဟုတ်ရပါဘူး။
မန္တလေးပဲကြော် စားချင်စရာလေး။ လုပ်စားကြည့်ဦးမယ်
ဝတ်ရည် ဆီထမင်းချက်နည်း သိချင်နေတာ ကြာပြီး... ခုလို အသေးစိတ်ပြောပြလို့ အရမ်းကျေးဇူးတင်ပါတယ်နော် အစ်မ...
အစ်မ မီးဖြည်းဖြည်းဆိုတာ ဘာကိုပြောတာလဲဟင်.. မီးပြင်းပြင်းတော့ မဟုတ်ဘူးထင်တယ်.. ဒါဆို မီး အေးအေး (မီးနည်းနည်း) ကိုဆိုလိုတာလား .. ဟီး မသိလို့နော်...
Gal Gal ရေ ............
မီး ဖြည်းဖြည်းဆိုတာက Gal Gal ပြောသလို မီး အေးအေးကို ဆိုလိုတာပါ။ :D
ဟဲ ဟဲ...အမရေ ..အမှားထောက်တာတော့ဟုတ်ဘူးနော်..
ဆီထမင်းမှာ ဆားဘယ်အချိန်ထည့်ရမှာလဲဟင်... :)
Post a Comment