Sunday, February 27, 2011

နှင်းမှိုပေါင်း


ဒီနေ့တော့ ဆီမပါ ပြားမပါတဲ့ နှင်းမှိုပေါင်းဟင်း တင်လိုက်ပါတယ်နော်။ အမေ့အိမ်ပြန်တာ ဆောင်းတွင်းအချိန်ဆိုတော့ အသီးအရွက်တွေ၊ နှင်းမှိုတွေ၊ မုန့်ညှင်းတွေ ပေါတဲ့အချိန်ပေါ့။ မှိုကပ်ပေါင်း၊ နှင်းမှိုပေါင်း၊ မုန့်ညှင်းပေါင်းတွေ ကြိုက်တဲ့ ကျွန်မအတွက်တော့ အလွန်အင်မတန် ကောင်းလှပါတယ်။ ခုလဲ အမေက သမီးရေ....... ဒီနေ့ နှင်းမှိုပေါင်းစားမလားဟေ့ မေးတယ်။ ဒီတော့ မိုးကောင်းသူလဲ အောက်မေးရိုးလေး လုပ်ပြီး ဟုတ်ခဲ့အမေ အရည် ရွဲရွဲ နှစ်နှစ်လေးနဲ့ စားချင်တယ်လို့ အတွန့်တွေရော၊ အနားတွေရောပါတက်ပြီး ပြန်ဖြေလိုက်တယ်။ ဟဲဟဲ........။ ဒီနေ့တော့ နှင်းမှိုပေါင်းဟင်းကို အားမနာတမ်း သုံးဆောင်သွားပါအုံးလား။


နှင်းမှိုပေါင်းကို ရရချင်း ရေနွေးကြမ်းနဲ့ မြည်းလိုက်တယ်။ အလိုလေး ရှမ်းနံနံ အနံ့လေးကလဲမွှေးလို့။ ငရုတ်သီး စပ်စပ်လေးနဲ့မို့ ကောင်းမှကောင်း။ အခုတောင် ပြန်စားချင်တယ်။

ပိုပြီး သွားရည်ကြအောင် အနီးကပ် ရိုက်လိုက်တယ်။ :D



အနှစ်များများနဲ့မို့လို့ ပေါင်းအိုးမှာ ဒီလို ပေါင်းလိုက်ပါတယ်။ အနှစ်မများရင် ငှက်ပျောဖက်နဲ့ထုပ်ပြီး ပေါင်းလဲ ရပါတယ်နော်။ ငှက်ပျောဖတ်နံ့တောင် ပိုမွေးသေးတယ်။



အမေ လက်အိတ်စွတ်ပြီး ဆား ပြား အရသာဝင်အောင် ပယ်ပယ်နယ်နယ် နယ်နေပါပြီ။

နှင်းမှိုရယ်၊ ကြက်သွန်ဖြူ နီ ထောင်းရယ်၊ ငရုတ်သီးထောင်းရယ်၊ ဆန်လှော်မှုန့်ရယ်၊ ရှမ်းနံနံရယ်၊ ဆားရယ်၊ အချိုရယ် စတာတွေ ထည့်ပါတယ်။

နှင်းမှို


နှင်းမှိုပေါင်း အတွက်လိုအပ်သောအရာ

နှင်းမှို ၁ ပိသာ
ကြက်သွန်နီ ဥကြီး ၇ လုံး
ကြက်သွန်ဖြူ ၃ ဥ
ငရုတ်သီးစိမ်း မိမိစိတ်ကြိုက်ထည့်ပါ
ရှမ်းနံနံ ၂ စည်း
ဆန်လှော်မှုန့် မွှေး တံဆိပ် ၂ ထုပ် (အနှစ်မများချင်ရင်တော့ ၁ ထုပ်လောက်ထည့်လဲ ရပါတယ်နော်)
ဆား
အချိုမှုန့်


ပြုလုပ်ပုံ

ပထမဦးစွာ နှင်းမှိုကို သဲစင်အောင် အမြီးတွေကို ကတ်ကြေးနဲ့ သေသေချာချာ ဖြတ်ပါ။ ပြီး ရေစင်ကြယ်အောင်ဆေးပါ။ ပြီး မှိုပွင့်ကြီးလျှင် နှစ်ခြမ်းစီ ခွဲပြီး ရေစစ်ထားလိုက်ပါ။ ပြီး ကြက်သွန်ဖြူ နီ၊ ငရုတ်သီးစိမ်းတို့ကို ထောင်းထား၊ ကြိတ်ထားပါ။ ပြီး ရှမ်းနံနံကို ရေဆေးပြီး လက်တစ်ဆစ်စာ အနေတော်လောက် လှီးထား၊ ဖြတ်ထားပါ။မဟုတ်လဲ မိမိစိတ်ကြိုက် လှီး၊ ဖြတ်နိုင်ပါတယ်နော်။ အဆင်သင့်ဖြစ်ရင် ဇလုံကြီးကြီးတစ်ခုထဲသို့ အားလုံးထည့်ပြီး နယ်ပါတော့မယ်။ ဆား၊ အချိုမှုန့်၊ ဆန်လှော်မှုန့်တို့ကိုပါ တစ်ခါတည်း ထည့်ပြီး နယ်ပါ။ ပြီး စတီးဇလုံ(သို့)ကြွေဇလုံ ထဲ နယ်ထားတဲ့မှိုကို ထည့်ပြီး ပေါင်းချောင်ထဲ ထည့်ပြီး စတင်ပေါင်းနိုင်ပါပြီနော်။ ပေါင်းအိုးထဲ ရေထည့်ဖို့လဲ မမေ့နဲ့အုံးနော်။ နာရီဝက်လောက်ဆိုရင်တော့ အနံ့လေး စတင်ရလာပါပြီနော်။ ကျွန်မတော့ အနံ့ရလာတာနဲ့ အရသာ အနေတော်ဟုတ်မဟုတ် အဖုံးလေး ဖွင့်လိုက် မြည်းလိုက်၊ အဖုံးလေး ပြန်ပိတ်လိုက်နဲ့ စတင်အလုပ်ရှုပ်နေပါပြီ။ နှင်းမှိုလေးလဲ နူးအိသွားရင်တော့ စတင် နှင်းမှိုပေါင်း ရပါပြီနော်။ ရှမ်းနံနံအနံ့မွှေးမွှေး နဲ့ ငရုတ်သီးစပ်စပ်လေးနဲ့မို့ အလွန်ကို စားကောင်းလှတဲ့ နှင်းမှိုပေါင်း ဟင်းတစ်ခွက်ရပါပြီ။


ကျန်းမာ ချမ်းသာကြပါစေ။

Friday, February 25, 2011

ခေါပုတ်ကြော်


မိုးကောင်းသူတို့ အမေ့အိမ်ကို ပြန်တုံး စားချင်တာလေးတွေ မှတ်သွားပြီး လုပ်ခိုင်းပြီး စားခဲ့တယ်။ ဒီနေ့ မနက်စာကို ဘာစားမယ်၊ ညာစားမယ်ဆိုပြီး ရှိသမျှ ပါဝါအပြည့်သုံးပြီး စားခဲ့တယ်။ ပါဝါမသုံးလဲ စားစေချင်လွန်းလို့ လုပ်ပေးတယ်။ ငါ့သမီးလေး အစားအသောက် ဆင်းရဲရှာမှာပဲဆိုပြီး မိုးလင်းကတည်းက မျက်စိနှစ်လုံးဖွင့်ပြီ ဆိုတာနဲ့ မနားတမ်း တစ်ခုပြီး တစ်ခု ကျွေးတော့တာပဲ။ အစားနဲ့ပါးစပ်နဲ့လက်နဲ့ကို မပြတ်စေရဘူး။ ကိုယ့်က အောက်မေးရိုးလေး အသာလေး လုပ်ပြီးစားရုံပဲ။ ဟဲဟဲ...........။ မိုးကောင်းသူတို့ ဇိမ်ကြနေတာ။ အမေရေ ခေါပုတ်ကြော်စားချင်တယ်ပြောတော့လဲ ခေါပုတ်ကြော်ပေးတယ်။ ကိုယ်က ဘေးကနေ တောက်တို လုပ်ပေးရုံပဲ။ မိုးကောင်းသူတို့က ခေါပုတ်ကြော် (သို့) ခေါပုတ်ကင်ကို ခရမ်းချဉ်သီး ပန်ထရွေဖျော်နဲ့တို့ စားရတာ အကြိုက်ဆုံးပဲ။ ဒုတိယ ဆီတိုပူးနဲ့တို့စား ရတာပေါ့။ ကိုယ်တော်ကြီးက ပဲပြုတ်လေးနဲ့မှ ဆိုလို ပဲပြုတ်လေးလဲ ပါသေးတယ်။ ကဲ ......... ဒီနေ့တော့ ခေါပုတ်ကြော်ကို အားမနာတမ်း သုံးဆောင်သွားပါအုံးလား။


ခေါပုတ်ကြော်၊ ခရမ်းချဉ်သီး ပန်ထရွေဖျော်၊ ဆီတိုပူး၊ ပဲပြုတ် ဆီဆမ်း၊ ရေနွေးကြမ်း



ဒါက မိုးကုတ် ခေါပုတ်ပါ။ မိုးကုတ်က အစ်မတော်ကြီးရဲ့သူငယ်ချင်းက လက်ဆောင်ပေးလို့။ စားလို့အရမ်းကောင်းတယ်။


ခေါပုတ်ကြော်


ဆီတိုပူး ဆီဆမ်း


ခရမ်းချဉ်သီး ပန်ထရွေဖျော် စပ်စပ်လေး


ပဲပြုတ် ဆီဆမ်း


ခရမ်းချဉ်သီးက ဗမာခရမ်းချဉ်သီးနဲ့ဖျော်တာပါ။ (ခရမ်းချဉ်သီးကို မီးမဖုတ်ဘဲ ပြုတ်လိုက်တယ်။ ငရုတ်သီး နဲ့ ကြက်သွန်ဖြူပဲ တစ်ခါတည်း ထည့်ပြုတ်လိုက်ပါတယ်။)

မိုးကုတ် ခေါပုတ်ပါ။


ခေါပုတ် လုပ်ရန်အတွက်လိုအပ်သောအရာ

ကောက်ညှင်းဆန် ၃ ဗူး (အဖြူ၊ အမည်း မိမိကြိုက်နှစ်သက်ရာ လုပ်စားနိုင်ပါတယ်။)
ဆီ
နှမ်းလှော် (ထောင်းထားပါ)
ဆား

ခေါပုတ်လုပ်နည်း

ပထမဆုံး ကောက်ညှင်းဆန်ကို ရေစင်စင်ဆေးပါ။ ပြီး ထမင်းအိုး ပေါင်းချောင်(သို့)အန် နဲ့ပေါင်းပေးပါ။ ကောက်ညှင်းကျက်ပြီဆိုရင် ငရုပ်ဆုံထဲသို့ထည့်ထောင်းပါမယ်။ (ငရုတ်ဆုံ မရှိသူများလဲ ကြွတ်ကြွတ်အိတ်သန့်သန့်(သို့) ပလက်စတစ်အိတ်သန့်သန့်ထဲ ကောက်ညှင်းဆန် ထည့်ပြီး ထောင်းနိုင်၊ ထုနိုင်ပါတယ်နော်။) ငရုတ်ဆုံမကပ်စေရန် အရင်ဆုံး ဆီနည်းနည်း သုတ်ပေး(သို့)ပွတ်ပေးလိုက်ပါ။ ပြီး ဆားနည်းနည်ထည့်၊ ထောင်းထားတဲ့ နှမ်းလှော်နည်းနည်းထည့်၊ ကောက်ညှင်းဆန်ထည့်ပြီး ထောင်းပေးပါ။ ဆန်လုံးပျောက်သွားသည်အထိထောင်းပေးပါနော်။ ပြီး ခေါပုတ်ကို ပြားပါတော့မယ်။ လက်ကို အရင်ဆုံး ဆီနည်းနည်းနဲ့ ပွတ်လိုက်ပါ။ ပြီးမိမိလိုချင်သော ခေါပုတ် အပြား အကြီး အသေး ကို ပြားနိုင်ပါပြီ။ ပြီး ဆီသုတ်ထားတဲ့ လင်ပန်းထဲသို့ထည့်ပြီး ခဏအေးသွားအောင်အထိထားလိုက်ရင်ပဲ ခေါပုတ်ရပါပြီ။ တစ်ချို့လဲ ထောင်းထောင်းပြီးချင်း ခေါပုတ်ကိုလုံး၊ ပြီး နှမ်းလှော်ထောင်းနဲ့ စားပါတယ်။ ပူပူလေးနဲ့ကောင်းမှကောင်းပါ။


ကျန်းမာ ချမ်းသာကြပါစေ။

Thursday, February 17, 2011

MALWARE ကင်းရှင်းသွားပါကြောင်း


မိုးကောင်းသူလေးလဲ အမေ့အိမ်ပြန်ပြီး ဟင်းအသစ်မတင်ဖြစ်ဘူး။ ပျင်းပျင်းနဲ့ နေပစေအုံးဆိုပြီး ထမင်းအိုးကို ဒီအတိုင်း ပစ်ထားလိုက်တယ်။ ဒီနေ့မှ စိတ်ကူးပေါက်ပေါက်နဲ့ အမေ့အိမ်က စားခဲ့တဲ့ဟင်းလေး တင်အုံးမှဆိုပြီး ဘလော့ဝင်လိုက်ပါတယ်။ မိုးကောင်းသူရဲ့ ထမင်းအိုး မှိုတက်နေရုံတင်မကဘဲ ၀ဲစားနေပါတယ်ဆိုပြီး စာတန်းတွေ့ရပါတယ်။ မိုးကောင်းသူတို့များ ကိုယ့်ထမင်းအိုး ၀ဲစား၊ ၀ဲကိုက် နေမှန်းမသိဘူး။ ဒီတော့မှ ဟိုဘလော့လဲ ၀ဲကိုက်တယ် ဒီဘလော့လဲ ၀ဲကိုက်တယ်နဲ့ ဟိုးလေးတစ်ကြော်ကြော်ဖြစ်နေတယ်။ မိုးကောင်းသူ အဖြစ်ကလဲ ဂလို ဂလို။ ဒါနဲ့ ဒီဝဲတော့ရှင်းအုံးမှ ဆိုပြီး ၀ဲရှင်းလင်းရေးစခန်း လုပ်ရပါတော့တယ်။ ၀ဲရှင်းလေးရေးလုပ်တာ အတော်လေးကြာသွားတယ်။ ဒီနေ့ ဟင်းတော့ အသစ်မတင်နိုင်တော့ဘူးကွယ်။ ပိတ်ရက်မှ အမေ့အိမ်က စားခဲ့သမျှဟင်းအသစ် တင်ပါတော့မယ်။


ကျန်းမာ ချမ်းသာကြပါစေ။