Saturday, January 30, 2010

ကြက်သားသုပ်

ကျွန်မက ကြက်ဆိုရင်အသားကို မကြိုက်ဘူး။ ရင်ဖုံမှလွဲလို့ ကျန်တဲအပိုင်းဆိုရင်တော့ ကြိုက်ပါတယ်။ ကြက်ဆိုအရိုးလေးကိုက်လိုက်ရမှကျေနပ်တယ်။ ရန်ကုန် ၁၉ လမ်း တရုတ်တန်းက ကြက်ခြေထောက်ပေါင်းဆိုအကြိုက်ဆုံးပေါ့။ အိမ်ပြန်တုံးက ၁၉ လမ်းမှာ သွားပြီး ၀ါးတီးဆွဲခဲ့သေးတယ်။ ကြက်အသဲအမြစ်ဆိုလဲ အမြစ်ပဲကြိုက်တယ်။ ဒီမှာက အသဲကြီးပဲသတ်သတ် အမြစ်ကြီးပဲသတ်သတ်ဝယ်လို့ရတော့ပိုကောင်းတာပေါ့နော်။ ဘဲမြစ်ဆိုပိုပြီးတောင်ကောင်းသေးတယ်။ ကြီးလဲကြီးတယ် စားရတာလဲ မာမာကျွတ်ကျွတ်လေး။ အဟီး ပြီးတော့ ကြက်ဆီဖူး(ဖင်ဆီဖူး)နဲ့ ကြက်အူလဲ ကြိုက်တယ်။ ကြက်အူကို ကြက်ကချင်ချက် ချက်သလိုချဉ်စပ်လေးချက်စားရင်ကောင်းမှကောင်းပဲ။ ကြက်ကချင်ချက်ချက်နည်းကိုတော့ ဒီမှာ ရေးဖူးပါတယ်။ (ကြက်အူကိုတော့ အသေအချာလေးရေဆေးရတာပေါ့နော်) ဒီမှာတော့ အဲဒါတွေဝယ်လို့မရတတ်ပါ။ ကြက်ဆီဖူးက ကြက်တကောင်လုံးဝယ်ရင်တော့ စားရပါသေးတယ်။ ဒီမှာ ကြက်အူကတော့ ရောင်ရမ်းပြီးတောင် မတွေ့မိ။ ဒီမိုးကောင်းသူတော့ ကိုယ့်အသားမဟုတ်တိုင်း သူများအသားကိုများပြောနေလိုက်တာ ဟိုဟာလေးကြိုက်တယ် ဒီဟာလေးကြိုက်တယ်နဲ့လို့ပြောတော့မှာပဲနော်။ ဒါမှ မဟုတ်လဲ ကြက်ဆီဖူးနဲ့ကြက်အူများ ပေါက်ပေါက်ရှာရှာကြိုက်လဲကြိုက်တတ်တယ် အံသြပါရဲ့နော် ဖြစ်နေတော့မည်။ အဟီး ပြောချင်တာက ကြက်ရင်ဖုံကိုချက်တာမစားချင်တာနဲ့ ဒီနေ့တော့ ကြက်သားသုပ်ချဉ်စပ်လေး လုပ်စားမှဆိုပြီးပြောချင်တာပါရှင်။ လေရှည်နေတာနဲ့ ကြက်သားသုပ်အကြောင်းပြောအုံးမှ။


ကြက်သားသုပ်၊ ပဲတောင့်ရှည်သုပ်၊ ဘူးသီးဟင်းခါး



ကြက်သားသုပ် ချဉ်စပ်လေး သုံးဆောင်သွားပါအုံးလား



ပဲတောင့်ရှည်သုပ် (မြေပဲဆံထောင်း၊ ကြက်သွန်နီ ဆီကျက်၊ ပဲကျက်မှုန့်၊ ပုဇွန်ခြောက်မှုန့်၊ ငံပြာရည်၊ အချိုမှုန့် ထည့်ပြီး သုပ်ထားပါတယ်ရှင်)


ဘူးသီးဟင်းခါး (ကြက်သားပြုတ်ရည်ထဲ ဘူးသီးရယ်၊ ပဲကြာဇံရယ်ထည့်လိုက်ပါတယ်)


လိုအပ်သောအရာ

ကြက်ရင်ဖုံ (မိမိကြိုက်နှစ်သက်သောအသားဆိုလဲရပါတယ်)
ခရမ်းချဉ်သီး ၂ လုံး
ဂေါ်ဖီထုပ်
ကြက်သွန်နီ ၂ လုံး ( ၁ လုံးကို ဆီကျက်ချက်)
ကြက်သွန်ဖြူ ၂ တက်
ငရုတ်သီးစိမ်း ၃ တောင့်
သံပရာသီးသေးသေး ၄ လုံး
ဗမာ နံနံပင်


သုပ်ပုံသုပ်နည်း

ကြက်သားကိုရေဆေး ဆား၊ အချိုမှုန့်ထည့်ပြီး အရင်ပြုတ်ထားပါ။ ဒီမှာက CP ကြက်တွေဆိုတော့ နာရီဝက်လောက်ဆိုရင်တော့ အသားများကျက်ပါပြီ။ ကြက်သွန်နီ၊ ကြက်သွန်ဖြူ၊ ခရမ်းချဉ်သီး၊ ငရုတ်သီး၊ ဂေါ်ဖီထုပ်၊ နံနံတို့ကို ပါးပါးလှီးထားပါ။ သုပ်မယ့်ပန်းကန်ထဲသို့ ပါးပါးလှီးထားသော ကြက်သွန်နီ၊ ကြက်သွန်ဖြူ၊ ခရမ်းချဉ်သီး၊ ငရုတ်သီး၊ နံနံတို့ကိုထည့်၊ ပြုတ်ထားတဲ့ကြက်သားကို အမျှင်လေးတွေနွှာပြီးထည့်၊ ဆား၊ အချိုမှုန့်ထည့်၊ သံပရာသီးညှစ်ထည့်ပြီး နယ်ပေးပါ။ အပေါ်ကနေ ကြက်သွန်နီဆီကျက်လေးကိုထည့်ပြီး စားလို့ရပါပြီရှင်။ ချဉ်ချဉ်စပ်စပ်နဲ့ အလွန်မြန်ဆန်သော ကြက်သားသုပ်ဟင်းတစ်ခွက်ရပါပြီ။ သုံးဆောင်သွားပါအုံးလား။

Saturday, January 23, 2010

လက်ဖက် နေ့ရက်

မနေ့က ညကြီးမှ အိမ်က ပါလာသော လက်ဖက်ရွက်အညွန့်ကို ကမန်းကတမ်း နပ်လိုက်ပါတယ်။ မိုးကုပ်လက်ဖက်အညွန့်လို့ ခေါ်လားမသိ။ မန္တလေးမှာနေတုံးကတော့ ဒီလိုအညွန့်ကြီးပဲ သုပ်တာစားဖူးတယ်။ ပဲကြော်ဆံမပါဘဲ လက်ဖက်အညွန့် သုပ်တာ။ ခေါက်ဆွဲခေါက်စားသလိုကို အားပါးတရ စားကြတာ။ ဒီနေ့တော့ သုပ်စရာ ခရမ်းချဉ်သီး နဲ့ ဂေါ်ဖီထုပ်လဲ မရှိတော့ အဖိုးကြီး အဖွားကြီးသုပ်ပဲ လုပ်စားလိုက်ပါတယ်။ အားမနာတမ်း သုံးဆောင်သွားပါအုံးလား။ အော် ........ ရေနွေးလေးတောင် ဓာတ်ပုံမရိုက်လိုက်ရဘူး။




ရှားရှားပါးပါး တွင်းပိုး သေးသေးလေး ၂ ထုပ်ပါလာတယ်။ မစားရတာကြာလို့လားမသိ အရသာတွေ ရှိနေတာ။



ဘယ်ဓာတ်ပုံက ပိုစားချင်စရာကောင်းမလဲလို့ နှစ်ပုံတင်လိုက်တာ။ ကြိုက်တဲ့ ပုံကို ကြည့်ပြီး စားသွားနော်။



လက်ဖက်နပ် အတွက်လိုအပ်သောအရာ


လက်ဖက် အညွန့်
ကြက်သွန်ဖြူ
ငရုတ်သီးစိမ်း
သံပရာသီး
ဆား
အချိုမှုန့်
ဆီ


လက်ဖက် နပ်ပုံ

လက်ဖက်ကို ရေစင်အောင်ဆေးလိုက်ပါ။ အခါးဓာတ်တွေ ထွက်သွားအောင်။ ခါးခါးသက်သက်လေး ကြိုက်တဲ့သသတွေကတော့ ၁ ခါလောက်ပဲ ရေဆေးပေါ့။ ရေဆေးပြီးရင် ရေစင်အောင် ညှစ်လိုက်ပါ။ လက်ဖက်နပ်မယ့် ဇလုံသေးသေးထဲသို့ ရေဆေးထားသော လက်ဖက်ကိုထည့်၊ သံပရာသီးကိုညစ်၊ ကြက်သွန်ဖြူ နဲ့ ငရုတ်သီးစိမ်ကို ပါးပါးလှီးပြီးထည့်၊ ဆားထည့်၊ အချိုမှုန့်ထည့်၊ ဆီနည်းနည်းထည့်ပြီး နယ်လိုက်ပါ။ အရသာ အချိုအငန်အချဉ်မြည်းကြည့်ပါ။ လက်ဖက်ညွန့်နပ် ရပါပြီရှင်။

Monday, January 18, 2010

အမေ့ အိမ်မှ စားခဲ့သော ၀က်သားဟင်းလျှာများ

အမေ့အိမ်မှာတော့ မိုးကောင်း ရှမ်းခေါက်ဆွဲ အပြင် အစားအများဆုံးကတော့ ၀က်သားဟင်းပါပဲရှင်။ ဒီမှာဆိုရင် ၀က်သားကို ရိုးရိုးချက်စားဖြစ်တာပဲ ပိုများပါတယ်။ အမေ့အိမ်မှာတော့ ၀က်သားကို ၀က်စတူး ၊ ၀က်ခြေထောက်စတူး (သို့) ၀က်ခြေထောက်စွပ်ပြုတ်၊ ၀က်သားအိုးကြီးချက်ဆိုလား အဲဒါတွေ ပိုစားဖြစ်ခဲ့တယ်။ ၀က်သားဆို အဆီ၊ အခေါက်တွေကြီးပဲ လိမ့်စားခဲ့တာမို့ ကျွန်မမိုးကောင်းသူလေးမှာ မဲမဲ လုံးလုံး တုတ်တုတ်လေးဖြစ်ပြီးပြန်လာခဲ့ပါတယ်။ :D
ဒီနေ့တော့ အချဉ်မပါဘဲ ၀က်သားဟင်းတွေကြီးပဲ တင်ပေးလိုက်တယ်နော်။ အားမနာတမ်းသုံးဆောင်သွားပါအုံးလား။



ဝက်ခြေထောက် စတူး။ အချဉ်မချထားပေးလို့ စိတ်ဆိုးနဲ့အုံးနော်။ ကျွန်မတော့ ၀က်သားကို ဒီအတိုင်းကြီးပဲ ကော်စားပလိုက်တယ်။



ဝက်စတူးချက်


နောက်တစ်နေ့ ၀က်စတူး (ဆီနည်းသေးတယ်နော်)။ ဇွန်းဘေးနားမှာ နီနီလေးမြင်နေရတဲ့ အသီးကတော့ စောကောသီးပါ။ ရန်ကုန်မှာတော့ စောကောသီးကို ဒီအတိုင်းထည့်လိုက်တယ်။ ပိုပြီးမွှေးသွားတာပေါ့။


ဝက်နံရိုးကြော်စားချင်တယ်ပြောလို့ ၀က်နံရိုးနုဝယ်ပြီး ကြော်ပေးပါတယ်။



နံရိုးကြော်ကြီးပဲ စားရတာ မကောင်းမှာစိုးလို့ ၀က်အူချိုလေးပါ တွဲလုပ်ထားပေးတယ်။ :D



ဝက်အူချိုက ဒုတ်ထိုးစတိုင်နော်။



ဝက်ခြေထောက်၊ ၀က်လက်ချက်နည်းကို တစ်ခါရေးဖူးပါတယ်။ နောက်တစ်ခါ ဒီနေရာက ကူးပြီး ပြန်တင်လိုက်ပါတယ်နော်။

ဝက်လက် စတူး အတွက် လိုအပ်သောအရာ

ဝက်လက်၊ ၀က်ခြေထောက်
ကန်စွန်းရွက် ၁ စည်းရဲ့တ၀က် (မထည့်လဲ ရပါတယ်နော်)
နာနတ်ပွင့် တခြမ်း
စောကောမှုန့်
ဂျင်း လက်နှစ်ဆစ်
ကြာညို့ (ခေါ်) ပဲငံရည်အနှောက်
သကြား နည်းနည်း


ဝက်လက် စတူး ချက်ပုံ

အိမ်မှာတော့ အရင်ဆုံး ၀က်လက်ကို မီးမြိုက်လိုက်ပါတယ်။ ပြီး ၀က်လက်ကို ဓားနဲ့ခြစ်ပါတယ်။ ပြီး အမွှေးညှပ်တဲ့ ဟာနဲ့ ၀က်လက်က အမွှေးတွေကို စိမ်ပြေ နပြေ နုတ်ရပါတယ်။ ကျွန်မကတော့ ဓားနဲ့ပဲခြစ်ပါတယ်။ ပြီး ၀က်လက်ကို အနေတော် အတုံးတုံးပါ။ ပြီး ဆီအိုးတည်ပါ။ ဆီကျက်ရင် ၀က်လက်ကို နည်းနည်း နီလာအောင်အထိ ကြော်ပေးပါ။ ၀က်လက်ရခါနီး နာနတ်ပွင့် တခြမ်းကိုထည့်လိုက်ပါ။ အနံ့မွှေးသွားပါလိမ့်မယ်။ ပြီး ပြုတ်မယ့်အိုးထဲသို့ ကြော်ထားတဲ့ ၀က်လက်ကိုထည့်၊ ဂျင်းထည့်၊ ဆားထည့်၊ အချိုမှုန့်ထည့်၊ သကြားနည်းနည်းထည့်၊ စောကောမှုန့်နည်းနည်းထည့်၊ ကြာညို့ (ခေါ်) ပဲငံရည်အနှောက်နည်းနည်းထည့်၊ ရေ ထည့်ပြီး နူးနေအောင်ပြုတ်ထားပေးပါ။ ၀က်လက်ပြုတ်နေချိန်မှာတော့ ကန်စွန်းရွက်ကို အနေတော် လှီးဖြတ်ပြီး ရေဆေးထားပါ။ ၀က်လက်များနူးအိပြီး ရေခမ်းနီး ကန်စွန်းရွက်ကို ထည့်၊ ၂ မိနစ်လောက်ဆို ရပါပြီ။ ၀က်လက် စတူး ရပါပြီနော်။

Tuesday, January 12, 2010

အမေ့အိမ်မှ စားခဲ့သော ရှမ်းခေါက်ဆွဲများ (မိုးကောင်း ချက်နည်း)

ပြီးခဲ့တဲ့ ဒီဇင်ဘာလက အမေ့အိမ်သို့ အလည်တစ်ခေါက်ပြန်ခဲ့ပါတယ်။ အမေ့အိမ်သို့ ရောက်ရောက်ချင်း ကြိုဆိုနေသော စားစရာကတော့ မိုးကောင်း ရှမ်းခေါက်ဆွဲပါပဲရှင်။ ဆောင်းတွင်းရာသီမို့လို့ ပဲရွက် (ခေါ်) ပဲလိပ်ပြာရွက်ပါ တွဲပြီးစားခဲ့ရပါတယ်။ အစားအသောက်မီးလိုတောက်သော မိုးကောင်းသူအတွက် မနက်စာတိုင်း ရှမ်းခေါက်ဆွဲပြင်ထားပေးတယ်။ မရိုးမအီနိုင်အောင် တစ်ပတ်ဆက်တိုက် မိုးကောင်းရှမ်းခေါက်ဆွဲကြီးပဲ စားခဲ့တယ်။ နောက်အပတ်တွေမှာတော့ ကျန်တဲ့ဟာတွေကို ပြောင်းပြီးစားပါတယ်။ ပဲပြုတ် နံပြား၊ ကောက်ညှင်းပေါင်းနဲ့ အကြော်၊ မုန့်ဟင်းခါး ဘာညာ ဘာညာ စတာတွေပေါ့။ ဒီနေ့တော့ မိုးကောင်းရှမ်းခေါက်ဆွဲကို အားပါးတရ သုံးဆောင်သွားပါအုံးလား။




ပဲရွက်များများနဲ့ စားခဲ့တယ်။


မျှစ်ချဉ်ပြုတ်၊ ရှမ်းချဉ်၊ ကုလားကြော်၊ ပဲရွက်ပြုတ် ကြိုက်ရာကို များများသာ ထည့်စားသွားနော်။ အားနာနဲ့။



နောက်တစ်နေ့ ရှမ်းခေါက်ဆွဲ


အဲဒီနေ့က ဗမာ မုန့်ညှင်းချဉ် နဲ့ စားပါတယ်။


ငါးများများထည့်လိုက်တယ်။



ကုလားကြော်ရယ်၊ ဗမာချဉ်ကို နံနံပင်နိုင်းချင်းနဲ့ သုပ်ထားပါတယ်။



စားမယ် သောက်မယ် ပျော်မယ် ပါးမယ်။

မိုးကောင်း ရှမ်းခေါက်ဆွဲချက်နည်းကို တစ်ခါရေးဖူးပါတယ်။ ဒီကနေ ပြန်ကူးလိုက်ပါတယ်နော်။

လိုအပ်သောစာရင်း
၁။ ဆန်ဆီးခေါက်ဆွဲ ၁ ပိသာ
၂။ ငါးကြင်း ၂၅ ကျပ်သား
၃။ ကြက်သွန်နီ၊ ကြက်သွန်ဖြူ၊ ဂျင်း
၎။ မြန်မာနံနံ၊ ရှမ်းနံနံ
၅။ မျှစ်ချဉ်(သေးသေးပါးပါးလှီးထားသော) ၁၅ ကျပ်သား (သို့) ရှမ်းချဉ်
၆။ ပဲပင်ပေါက်(သို့) ပဲရွက် (သို့) ဘေဘီမုန့်ညင်း (မကြိုက်လို့ မထည့်လဲ ရပါတယ်)
၇။ ပဲမုန့်စိမ်း
၈။ ကုလားဗရာကြော် (မိမိကြိုက်နှစ်သက်ရာ အကြော်စုံထည့်စားနိုင်ပါတယ်)


ခေါက်ဆွဲဟင်းရည်ပြုလုပ်ပုံ

ခေါက်ဆွဲဟင်းရည်အတွက် ရေနွေးအိုးတည်ထားပါ။
ငါးကြင်းကို ရေဆေးပြီး ဆား၊ အချိုမှုန့် အနည်းငယ်ထည့်နယ်ပြီး ၁၅ မိနစ်လောက် နပ်ထားပါ။ ပြီး
ရင် ငါးကြင်းကို မီးသွေးမီးနဲ့ကင်ပါ။ မီးဖြည်းဖြည်းနဲ့ကင်ပေးပါ။ ၁၀ မိနစ်၊ ၁၅ မိနစ်လောက်ဆို ရပါပြီ။ မီးသွေးမီး မရှိလဲ ဆီနည်းနည်းနဲ့ ကြော်ပေးပါ။ မီးကင်တာကတော့ ပိုပြီးမွှေးတာပေါ့။ ငါးကျက်ပြီဆိုရင် အအေးခံထားပြီး အရိုးနွင်ပါ။ ပြီးရင် ဟင်းရည်းအိုးလုပ်မယ့်အိုးထဲသို့ အရိုးနွင်ထားသော ငါးကြင်း၊ ကြက်သွန်နီ လေးခြမ်းစိတ် ၇ လုံး ကြက်သွန်ဖြူ တမွှာကို ဓားနဲ့ရိုက်ပြား၊ ဂျင်းလက် ၃ တစ်လောက်ကိုလဲ ဓားရိုက်ပြားပြီး ထည့်ပါ။ ဆား၊ အချို့မုန့် ထည့်ပါ။ ရေနွေးထည့်ပြီး ဆူအောင်ထည်ထားပါလေ။ ဟင်းရည်အိုးဆူလာလျှင်စတင် စားသုံးနိုင်ပါပြီ။


ခေါက်ဆွဲနဲ့တွဲဖက်စားမည့်မျှစ်ချဉ်ပြုတ်လုပ်နည်း

မျှစ်ချဉ်ကို ဆား၊ အချိုမုန့်၊ ဆနွင်း အနည်းငယ်၊ ရေထည့်ပြီး မိနစ် ၃၀ လောက်ရေခမ်းအောင်ပြုတ်ထားပါလေ။ ကြိုက်တတ်လျှင် ရှမ်းနံနံ (သို့) ပင်စိမ်းကို ရေခမ်းခါနီးထည့်အုပ်နိုင်ပါတယ်။

ထည့်စားရမည့် အစာပလာများ


ကကသွန်ဖြူ ဆီချက် ဆနွင်းနဲ့ ချက်ထားပါ။
ငရုတ်ဆီ ဆီချက် နီနီ ချက်ထားပါ။
ပဲမုန့်ကို ရေဖျော်ပြီး ဆား၊ အချိုမုန့်၊ ဆနွင်း အနည်းငယ်ထည့်ပြီး တိုးပူးနွေး ကျိုသလို မပျစ်မကျဲကျိုပါ။
ပဲပင်ပေါက်(သို့) ပဲရွက် (သို့) ဘေဘီမုန့်ညင်း တို့ကို ရေနွေးဖျောထားပါ။
နံနံပင်ကို ပါးပါးလှီးထားပါ။

ရှမ်းခေါက်ဆွဲပြင်ဆင်ပုံ

ဆန်ဆီးခေါက်ဆွဲကို ပြုတ်ပါ။
စားမည့်ပန်ကန်လုံးထဲသို့ ပြုတ်ထားသော ဆန်ဆီးခေါက်ဆွဲထည့်၊ ကျိုထားသော ဟင်ဗျစ်(ခေါ်)တိုပူးကျဲကျဲ ၁ဇွန်းလောက်ထည့်၊ ရေဖျောထားသော ပဲပင်ပေါက်(သို့) ပဲရွက် (သို့) ဘေဘီမုန့်ညင်းထည့်၊ တိုပန်ကျန် (ခေါ်) တရုတ်ပဲငါးပိထည့်(ဆားကတော့ လိုမှထည့်တော့နော်)၊ အချိုမှုန့်ထည့်၊ ဆီကျက် နီနီထည့်၊ ဆီကျက် ၀ါဝါထည့်၊ နံနံပင်ထည့်၊ ကုလားဗရာကြော်ကိုချေပြီးထည့်၊ ပြုတ်ထားသော မျှစ်ချဉ်နဲ့တွဲပြီး စားသုံးနိုင်ပါပြီ။ ဒါကတော့ အသုပ်စားတဲ့နည်းပါ။ အရည်နဲ့စားချင်ရင် ငါးဟင်းရည်ထည့် စားလိုက်ရင် အရည်နဲ့ရပါပြီ။