အားနာနဲ့နော်။ ဖြည်းဖြည်းချင်း သုံးဆောင်သွားပါအုံးလား။
ရွှေခေါင်းပြောင်ချက် (ခေါ်) ကြက်ဥချက်ပါရှင်။
ပဲပုပ်ထောင်း
ကြက်ဥချက် အတွက် လိုအပ်သောအရာ
ကြက်ဥ ၆ လုံး
ကြက်သွန်နီ ၂ လုံး
ကြက်သွန်ဖြူ ၃ တက်
ခရမ်းချဉ်သီး ၂ လုံး
ငရုတ်သီးစိမ်း
နံနံပင်
ကြက်ဥ ချက်နည်း
ကြက်ဥ ၂၀ မိနစ်လောက် ပြုတ်ပြီး အခွံခွာထားပါ။ ကြက်သွန်နီ၊ ကြက်သွန်ဖြူကို အခွံခွာပြီးထောင်းထားပါ။ ခရမ်းချဉ်သီးကို ပါးပါးလှီးထားပါ။ ချက်မယ့်အိုးထဲသို့ ဆီနည်းနည်းထည့်ပါ။ ဆီကျက်လာရင် ထောင်းထားသော ကြက်သွန်နီ၊ ကြက်သွန်ဖြူကို အရောင်နီလာအောင် ဆီသတ်ပါ။ အရောင်တင်မှုန့်အနီ၊ ဆနွင်းနည်းနည်းထည့်ပါ။ ပြီးရင် ခရမ်းချဉ်သီးထည့်ပါ။ ငံပြာရည် နည်းနည်း ၊ အချိုမှုန့်နည်းနည်း ထည့်ပေးပါ။ ဆီပြန်လာအောင်ချက်ပေးပါ။ ဆီပြန်လာရင် ပြုတ်ထားတဲ့ ကြက်ဥကိုထည့်ပါ။ ၅ မိနစ်လောက် ကြာရင် မီးဖိုပေါ်က ချနိုင်ပါပြီ။ မီးဖိုပေါ်က မချခင် နံနံပင် နဲ့ ငရုတ်သီးစိမ်းတောင့်လေး ထည့်လိုက်ပါတယ်။ ကြက်ဥချက် ရပါပြီရှင်။
---------------
ပဲပုပ်ထောင်းနည်း
ပဲပုပ် ၅ ပြားကို မီးကင်လိုက်ပါ။ ကင်စရာ မီးသွေးမီး မရှိတော့ မီးမကင်ဘဲ ဆီနည်းနည်းထည့်ပြီး ကျွတ်နေအောင် ကြော်လိုက်ပါတယ်။ ပြီးရင် ကြက်သွန်ဖြူ ၃ တက်၊ ဂျင်း လက်တစ်ဆစ်၊ ငရုတ်သီးစိမ်း ၅ တောင့်၊ ဆား၊ အချိုမှုန့်ထည့်ပြီး ငရုတ်ဆုံထဲ ထည့်ထောင်းလိုက်ပါတယ်ရှင်။ ငရုတ်ဆုံ မရှိလဲ စိတ်မပူနဲ့နော်။ blander ထဲ ထည့်ကျိတ်လိုက်ပါ။ ပဲပုပ်ထောင်း မွှေးမွှေးလေး ရပါပြီရှင်။
---------------
အရွက် ချွဲချွဲ ဟင်းချိုရည်
အရွက်က ချွဲချွဲမို့လို့ အရွက်ချွဲချွဲလို့ ခေါ်လိုက်ပါတယ်။ ဟင်းချိုချက်မယ့် အိုးထဲသို့ မိမိလိုသလောက် ရေထည့်လိုက်ပါတယ်။ ပြီးရင် ကြက်သွန်နီ ၁ လုံးကို လေးခြမ်းစိတ်ပြီး ထည့်လိုက်တယ်။ ကြက်သွန်ဖြူ ၁ တက်ကို ထောင်းထည့်လိုက်တယ်။ ပုဇွန်ခြောက်နည်းနည်း ထောင်းထည့်လိုက်တယ်။ ဆား နဲ့ အချိုမှုန့် နည်းနည်းထည့်လိုက်တယ်။ ဟင်းချိုအိုး ဆူလာအောင် တည်ထားလိုက်ပါတယ်။ ဟင်းချိုအိုး ဆူလာရင်တော့ အရွက်ချွဲချွဲကို ထည့်လိုက်ပါတယ်။ ၃ မိနစ်လောက်ဆို ရပါပြီရှင်။
