Friday, April 2, 2010

ချဉ်ပေါင်သီးထောင်း

Sheng Siong supermarket ကနေ ချဉ်ပေါင်သီးကို ရှားရှားပါးပါးတွေ့ခဲ့တယ်။ တွေ့တော့ ချဉ်ပေါင်သီးကော ဟုတ်ကော ဟုတ်ရဲ့လားလို့ သေသေချာချာပြန်ကြည့်ရတယ်။ ချဉ်ပေါင်သီးကို ဟင်းရည်လဲချက်စားလို့ရတယ်။ ချဉ်ပေါင်သီးယိုဆိုပြီး ယိုထိုးစားလို့လဲ ရတယ်။ ချဉ်ပေါင်သီးစပ်စပ်လေး ထောင်းစားလို့လဲ ရပါတယ်။ အဲဒီသုံးမျိုးထဲက ဘယ်လိုလုပ်စားရမလဲပေါ့။ ဟင်းရည်ချက်မယ်ဆိုရင်လဲ ချဉ်ပေါင်ရွက်ကို ဟင်းရည်ချက်စားလဲရတယ်ပဲ။ ဒီတော့ ချဉ်ဟင်းတော့ မချက်စားတော့ဘူး။ ယိုထိုးစားမယ်ဆိုရင်လဲ ပြောသလောက်မများ။ ဒါဆိုတော့ စပ်စပ်ကလေးထောင်းစားလိုက်မယ်ပေါ့။ ဟင်းရည်ချိုပူပူလေးနဲ့ဆို အလွန်လိုက်ပါတယ်။ ဒီတော့ မုန်းညှင်းနဲ့တိုပူးတုံးလေးထည့်ပြီးချက်လိုက်ပါတယ်။ အားမနာတမ်း သုံးဆောင်သွားပါအုံးလား။



ချဉ်ပေါင်သီး တော်တော်လေးကိုကြီးပါတယ်။


ဒီလိုလေးထုပ်ထားတာကို မြင်ခဲ့ပြီး ၀ယ်ခဲ့ပါတယ်။


ချဉ်ပေါင်သီးထောင်း


ဝက်အူချောင်းကြော်၊ ချဉ်ပေါင်သီးထောင်း၊ မုန့်ညှင်းနဲ့တိုပူးဟင်းချိုပူပူလေး


ချဉ်ပေါင်းသီးထောင်းအတွက် လိုအပ်သောအရာ

ချဉ်ပေါင်သီး
ငရုတ်သီးစိမ်း (မိမိလိုသလောက်ထည့်ပါ)
ကြက်သွန်ဖြူ
ငါးပိကင်
ပုဇွန်ခြောက်ထောင်း


ချဉ်ပေါင်သီးထောင်းနည်း

ချဉ်ပေါင်သီးကို အရင်ဆုံးရေဆေးလိုက်ပါတယ်။ ပြီး ခလယ်ကနေ နှစ်ခြမ်း ခြမ်းလိုက်ပါတယ်။ ပြီး ခလယ်ကအဖူးကို ဖယ်ထုတ်ပြီး ပစ်လိုက်ပါတယ်။ ငရုတ်ဆုံထဲသို့ ချဉ်ပေါင်သီး၊ ငရုတ်သီးစိမ်း၊ ကြက်သွန်ဖြူ၊ ငါးပိကင်၊ ပုဇွန်ခြောက်ထောင်း၊ ဆား၊ အချိုမှုန့် (အချိုမှုန့်က စားနေကြမို့လို့ ဖြတ်လို့ မရသေးပါဘူး။ လျှော့ပြီးတော့ ထည့်ပါတယ်။ အချိုမှုန့် မစားတဲ့သူတွေလဲ ဟင်းခတ်မှုန့်ထည့်စားနိုင်ပါတယ်နော်။) ထည့်ပြီး ထောင်းနိုင်ပါပြီရှင်။ ငရုတ်ဆုံမရှိလဲ ကြိတ်စက်ထဲ ထည့်ပြီးထည့်ကြိတ်လိုက်ပါ။ ဒါဆိုရင်တော့ ချဉ်ပေါင်သီးထောင်း စပ်စပ်လေးရပါပြီ။