Sunday, June 12, 2011

ဆိတ်ရိုးစွပ်ပြုတ်

မနေ့ကချက်တဲ့ ဆိတ်ရိုးစွပ်ပြုတ် တင်လိုက်ပါတယ်နော်။ ခုတစ်လော ရုံးပိတ်ရက်ဆို ရာသီဥတုကလည်း ကိုယ်တော်ကြီးဘက် ပါပါနေတယ်။ အဟဲ ။ ဒီအပတ်ပါဆို ပိတ်ရက် ၂ ပတ် ဆက်တိုက်ရှိပြီ။ ပိတ်ရက် ဆို မိုးတွေကြီး လိမ့်ပိန့်ရွာနေတယ်။ မိုးလေးကလည်း အေးအေးလေးနဲ့ဆိုတော့ ကိုယ်တော်ကြီးလည်း အရည်သောက်မှ (ရေနွေးကြမ်း ပြောပါတယ်။ :D) ဖြစ်ပေတော့မည်။ ကိုယ်က အရည်ဦးအောင် တိုက်ထားမှ ဆိုပြီး ဆိတ်ရိုး စွပ်ပြုတ် အရည်သောက် ပူပူလေး လုပ်ပြီး တိုက်လိုက်ပါတယ်နော်။ ကိုယ်တော်ကြီးက မနက်တာ ရေနွေးကြမ်းသောက် လွတ်သွားပါတယ်။ ညနေတော့ ကိုကြီး ဒီဘီတို့နဲ့ အစည်းအဝေးရှိလို့ ချယ်ရီမေမှာ ရေနွေးကြမ်းသောက်လိုက်တာ သန်းခေါင်ယံမှ အိမ်ပြန်ရောက်ပါရောလား။ ဒီလို ရာသီဥတု အေးအေးလေးနဲ့ဆို အရည်သောက် ပူပူလေးတွေ ချက်စားတာ အလွန်ကောင်းပါတယ်နော်။ နောက်ထပ် အရည်သောက် ပူပူလေးတွေ ချက်စားမယ်ဆိုရင်တော့ မုန့်ဟင်းခါး၊ ကြာဇံဟင်းခါး၊ အုန်းနို့ခေါက်ဆွဲ၊ အာပူလျှာပူ (ခေါ်) ရခိုင်မုန့်တီ၊ မြေအိုး မြီးရှည်၊ စမူဆာ ပဲရည်သုပ် အဲဒါတွေ ချက်စားလည်း ရပါတယ်နော်။ နောက်ဆို သိပြီ ရေနွေးကြမ်းကြီးပဲ ကျိုကျို တိုက်ပလိုက်မယ်။ ဒီနေ့တော့ ဆိတ်ရိုး စွပ်ပြုတ် အရည်သောက်ပူပူလေးကိုပဲ အားမနာတမ်း သုံးဆောင်သွားပါအုံးလား။

ဆိတ်ရိုးစွပ်ပြုတ်ရယ်၊ ကုလားဗယာကြော်ရယ် 
 ဆိတ်ရိုးစွပ်ပြုတ် အနီးကပ်
ပြင်းတော်သိမ်ရွက် နိုင်းချင်းနဲ့ ကြော်ထားတဲ့ ကုလားဗယာကြော် မွှေးမွှေးလေး

ဆိတ်ရိုးရယ်၊ ဂျင်းရယ်၊ ကြက်သွန်နီ လေးခြမ်းစိတ်တွေရယ်၊ ကြက်သွန်ဖြူ လုံးခွဲထောင်းရယ်၊ စပါးလင်ရယ်၊ ဆားရယ်၊ အချိုရယ် အရင်ဆုံး လုံးလိုက်ပါတယ်။

ဆိတ်ရိုးစွပ် အတွက်လိုအပ်သောအရာ
ဆိတ်ရိုး ၁ ကီလို
အာလူး ကီလိုဝက် (အာလူးကို မထည့်လဲ ရပါတယ်နော်)
ကြက်သွန်နီ ကြီးကြီး ၆ လုံး (လေးခြမ်းစိတ်ထားပါ)
ကြက်သွန်ဖြူ ၁ ဥ (လုံးခွဲထောင်းထားပါ)
ဂျင်း လက် နှစ်ဆစ်စီ ၃ တက် (အခွံခွာပြီး ကျည်ပွေ့နဲ့ထုထားပါ)
စပါးလင် ၂ ချောင်း (အပေါ်အခွံခွာပြီး ကျည်ပွေ့နဲ့ထုထားပါ)


ဆိတ်ရိုး စွပ်ပြုတ်ချက်ပုံ
ဆိတ်ရိုးကို ရေ စင်စင်ဆေးလိုက်ပါတယ်။ ပြီး ဇလုံထဲထည့် သံပရာသီး တစ်လုံးကို အရည်ညစ်၊ ဆားထည့်ပြီး နာရီဝက်လောက် နယ်နပ်ထားလိုက်ပါတယ်။ သံပရာသီးညစ်ရတာက အနံ မနံအောင်လို့ပါ။ ဆိတ်ရိုးကို နယ်နပ်ထားတဲ့အချိန် အာလူးကို အခွံခွာ ၂ ခြမ်းခြမ်းပြီး ရေစိမ်ထားလိုက်တယ်။ ရေစိမ်လိုက်တာက အာလူး အရောင်မမည်းသွားအောင်လို့ပါ။ ပြီးကြက်သွန်နီကို လေးခြမ်းစိတ်ထားပါ။ ကြက်သွန်ဖြူကို လုံးခွဲထောင်းထားပါ။ ဂျင်း အခွံခွာပြီး ကျည်ပွေ့နဲ့ထုထားပါ။ စပါးလင်ကို အပေါ်အခွံခွာပြီး ကျည်ပွေ့နဲ့ထုထားပါ။ ပြီး ဆိတ်ရိုးကို နောက်ထပ် ရေစင်စင်ပြန်ဆေးပါတယ်။ ပြီး ပြုတ်မယ်အိုးထဲသို့ ဆိတ်ရိုးရယ်၊ ဂျင်းရယ်၊ ကြက်သွန်နီ လေးခြမ်းစိတ်တွေရယ်၊ ကြက်သွန်ဖြူ လုံးခွဲထောင်းရယ်၊ စပါးလင်ရယ်၊ ဆားရယ်၊ အချိုရယ် ထည့်ပြီး အရင်ဆုံး လုံးလိုက်ပါတယ်။ မိနစ် ၂၀ လောက်ဆို  အားလူးထည့်၊ ရေနွေးထည့်ပြီး နူးအောင်တည်ထားပေးပါ။ ဒါဆိုရင်တော့ ဆိတ်ရိုး စွပ်ပြုတ် ပူပူလေး ရပါပြီနော်။


ကျန်းမာ ချမ်းသာကြပါစေ။

Thursday, June 2, 2011

ငချိတ်ပေါင်း

ဒီနေ့ ရုံးပိတ်ရက်က လုပ်စားထားတဲ့ မနက်စာ လိုက်ပါတယ်နော်။ လုပ်စားထားတာတော့ အတော်ကြီးကို ကြာပါပြီ။ ဒီလို မနက်စာကို တစ်နစ်မှာ တစ်ခါ တစ်လမှာ တစ်ရက် ပွင့်တဲ့ ပိတောက်.......... အယ် ဟုတ်ပေါင်၊ တစ်နစ်မှာ တစ်ခါ တစ်လမှာ တစ်ရက် တာလုပ်စားတဲ့ နံနက်ခင်း မနက်စာဖြစ်ပါတယ်။ ဘာလို့လဲဆိုတော့ ရုံးပိတ်ရက် ထတဲ့အချိန်တွေဆို နိုးတာနဲ့ နေ့လည်ရောက်သွားပြီ။ အဟဲ :P။ ဒီနေ့တော့ အားမနာတမ်းကို မနက်စာ ငချိတ်ပေါင်း သုံးဆောင်သွားပါအုံးလား။


ငချိတ်ပေါင်းရယ်၊ ပဲပြုတ်ရယ်၊ ဗယာကြော်ရယ်၊ အာဗြဲခြောက်ရယ်၊ လက်ဖက်ရည်ရယ် (အဲနေ့ ရုံးပိတ်ရက် မနက်စာတော့ ရှယ်ပါပဲ။)

အမေ့အိမ်ကနေ ထည့်ပေးလိုက်တဲ့ ပဲပြုတ်

အမေ့အိမ်က ထည့်ပေးလိုက်တဲ့ အာဗြဲခြောက်ဖုတ်
ငချိတ်ပေါင်းချက်ပုံ
ငချိတ်ကိုရေဆေးပါ။ ပုံမှန် ထမင်းချက်သလို ရေထည့်ပြီး အလွယ်တကူ ချက်လိုက်ပါတယ်နော်။ ဒါဆိုရင် ငချိတ်ပေါင်း ရပါပြီ။

ကျန်းမာ ချမ်းသာကြပါစေ။

Sunday, May 22, 2011

သပွတ်သီးချဉ်ဟင်း (သို့) ဂျီးတွန်းကျောက်ချဉ်ဟင်း

ဒီနေ့ သပွတ်သီးချဉ်ဟင်း (သို့) ဂျီးတွန်းကျောက်ချဉ်ဟင်း ပို့စ်တင်လိုက်ပါတယ်နော်။ သပွတ်သီးကို ဂိုးဒင်းမိုင်းကနေ ၀ယ်လာတာပါ။ မိုးကောင်းသူရယ် ရိုးရိုးတန်းတန်း သပွတ်သီးချဉ်ဟင်းလို့ပဲ ရေးရင်ရပါပြီ၊ ဘယ့်နယ်တော် ဂျီးတွန်းကျောက်ချဉ်ဟင်းဆိုတော့ ချက်စားရမှာ ခပ်ကြောက်ကြောက်ရယ်လို့ ပြောတော့မယ်။ ဒါမှလဲ သပွတ်သီးကို မျက်စိထဲ ကွင်းကွင်းကွက်ကွက်မြင်တော့မယ်လေ။ ဟုတ်ဘူးလား။ ဂျီးတွန်းကျောက်ချဉ်ဟင်းခေါ်ရတဲ့ ဇာတ်လမ်းအကြောင်းစုံလည်းပြောရအုံးမယ်။ အမေ့အိမ်မှာတုံးက သပွတ်သီးဟင်း စားချင်လွန်းလို့ သပွတ်သီးပင်ကို  ယုယုရရ အိမ်မှာ စိုက်ထားရတယ်။ သပွတ်သီးလေးတွေလဲ သီးရော ချဉ်ပေါင်နဲ့ရောပြီး အရည်ခပ်စပ်စပ်နဲ့ ချဉ်ဟင်းချက်တယ်။ (အရည် ခပ်စပ်စပ်ဆိုသည်မှာ ငရုတ်သီး စပ်တာကို ဆိုလိုချင်းမဟုတ်ပါ။ အရည် ပါလေရုံဆိုတာကိုပြောတာပါ။ ရှင်းပြမှ ရှုပ်ကုန်ပြီထင်ပါသည်။) ပြီးတော့ ရုံးကို သပွတ်သီးချဉ်ဟင်းနဲ့ တခြားဟင်း ထမင်းချိုင့်ထည့်သွားတယ်။ နေ့လည် ထမင်းစားချိန်လည်းရောက်ရော သူသူငှာငှာ သူ့ထမင်းချိုင့်၊ ငါ့ထမင်းချိုင့်ဖွင့်ကြတာပေါ့။ မိုးကောင်းသူ ထမင်းချိုင့်ကို ဖွင့်ရော အယ် ......... အစ်မဟင်းက ချဉ်ပေါင်ဟင်းနဲ့သခွားသီးဟင်းလား။ ဘာဟင်းကြီးတုံးမေးတော့ သပွတ်သီးချဉ်ဟင်းဆိုပြီး ကြွားကြွားဝင့်ဝင့်နဲ့ ပြောပလိုက်တယ်။ ရုံးကလူတွေ ပြန်ပြောလိုက်တာက အီးးးးးးးးးးး အစ်မဟင်းရည်က ဂျီးတွန်းကျောက်ကြီးလားတဲ့။ ကောင်းကြသေးလား အရပ်ကတို့ရေ။  သူတို့ပြောမှ သပွတ်သီးချဉ်ရည်ဟင်းကနေ ဂျီးတွန်းကျောက်ချဉ်ရည်ဟင်းဖြစ်သွားပါရောလား။ အဲလိုဆိုတော့လဲ ဟင်းနာမည် အခေါ်အဝေါ် ခပ်ဆန်းဆန်း တစ်ခုတိုးတာပေါ့လေ။ သူတို့က အဲလိုပြောတာလဲ ဟုတ်လဲ ဟုတ်တာကို သပွတ်သီးက ရင့်လွန်းသွားရင် အိုးတိုက် ပန်းကန်းဆေးလို့ ရသလို၊ ဂျီးလဲတွန်းလို့ ရတာကိုး။ သူတို့က ဂျီးတွန်းကျောက်နုနုရဲ့ အရသာကိုမှ မသိကြဘဲလေ။ ဂျီးတွန်းကျောက်အရသာက အဲ ....... ဟုတ်ပါဘူး သပွတ်သီး အရသာက အိအိစက်စက်နဲ့ စားလို့အင်မသိအင်မတန် အလွန့်အလွန် ကောင်းပါတယ်။ ဘယ်လို ပြောရမှန်းတောင်း မသိဘူး။ မယုံရင် ပုံပြင်မှတ်၊ ဟုတ်ပေါင် မယုံရင်ချဉ်ပေါင်နဲ့ရောပြီးချက်စားကြည့်လိုက်ပါလို့။ အဟဲ။ သပွတ်သီးနုနုကို သပွတ်ချဉ်တည်စားမလား၊ အခုလို ချဉ်ဟင်းချက်စားမလား၊ သားပြွင်းဟင်းချက်စားမလား၊ ငါးပိရည်ကျို နဲ့ အတို့အမြုပ် စားမလား ကြိုက်သလိုစားလို့ ရပါတယ်နော်။ တစ်ခြားဘယ်လို ချက်စားကြသေးလည်း မသိ။ ကျွန်မတော့ ဒီလိုလုပ်စားတာပဲ သိတယ်။ ဒီနေ့တော့ သပွတ်သီးချဉ်ဟင်း (သို့) ဂျီးတွန်းကျောက်ချဉ်ဟင်း ကိုအားမနာတမ်း သုံးဆောင်သွားပါအုံးလား။

သပွတ်သီးချဉ်ဟင်းရယ်၊ ကြက်သားကြော်ကျွတ်ကျွတ်လေးရယ်၊ ငရုတ်သီးကြော်ရယ်၊ ငါးပိရည်ကျိုရယ်၊ (ငါးပိရည်ကျိုကလည်း မည်းချက်တော်လို့ပြောတော့မည်။ ကြူကြူမွှေး တံဆိပ်ကို ဆီမပါ၊ ဆနွင်းမပါဘဲ ရိုးရိုး ပလိန်းကျိုထားပါသည်။) ဆလပ်ရွက် နဲ့ သခွားသီး အတို့အမြုပ်ရယ် (ဒီနေ့ ထမင်းအိုးတော့ ထမင်းစေ့ တစ်စေ့မကျန် ပြောင်သွားတာပဲ။ ထမင်းအိုးတောင် ဆေးစရာ မလိုတော့ဘူး။ ဒီ မိုးကောင်းသူနယ် သူ့ဟင်းကို သိပ်ညွန်းတာ လို့ပြောတော့မယ်။ ဟဲဟဲ။)
ဆီမပါ ပြားမပါတဲ့ သပွတ်သီးချဉ်ဟင်းပါ။

သပွတ်သီးကို အခွံကို ဓားနဲ့ခြစ်ပြီး အ၀ိုင်းလိုက် လှီးထားပါတယ်။

နောက်တစ်ရက်က သပွတ်သီး သားပြွင်းဟင်းချက်စားပါစတယ်။ ဒီလို သားပြွင်းဟင်းကလည်း ထမင်းမြိန်ချက်။ :D (သပွတ်သီးရယ်၊ ခရမ်းချွတ်သီးသေးသေးရယ်၊ ချဉ်ပေါင်ရယ် ရောချက်ထားတာပါ။)


သပွတ်သီးချဉ်ဟင်းအတွက် လိုအပ်သောအရာ
သပွတ်သီး ၂ လုံး (ဂိုးဒင်းမိုင်း ပလာဇာကနေ ၀ယ်လာပါတယ်။၎ လုံးဝယ်လာတာ နှစ်လုံးဆီ တစ်ခါတစ်မျိုးဆီ ချက်စားလိုက်ပါတယ်နော်။)
ချဉ်ပေါင် ၁ စည်း၊ ၁ ထုပ်
ပုဇွန်ခြောက်ထောင်း
ကြက်သွန်ဖြူ ၅ တက်
ကြက်သွန်နီ ၁ လုံး
ငါးပိ လက်တစ်ဆစ်
နံနံပင် (လိုသလောက်ထည့်ပါ။ မထည့်လဲ ရပါတယ်။)

ချဉ်ဟင်းချက်ပုံ

ချဉ်ပေါင်ကို အရွက်တင်ပြီးသား ပင်နီဆိုလာက ၀ယ်လာပါတယ်။ ပြီးရေစင်စင်ဆေးပါတယ်။ သပွတ်သီးကို ဓားနဲ့ အခွံခြစ်ပါတယ်။ အခွံမနွှာပါဘူး။ ခြစ်ရုံပဲခြစ်တာပါ။ ပြီး အ၀ိုင်းလိုက်လှီးလိုက်ပါတယ်။ ကြက်သွန်ဖြူကို ထောင်းလိုက်တယ်။ ကြက်သွန်နီကို ပါးပါးလှီးလိုက်တယ်။ ပြီးချဉ်ဟင်းတည်မယ့်အိုးထဲသို့ ချဉ်ပေါင်ရွက်ရယ်၊ သပွတ်သီးရယ်၊ ကြက်သွန်ဖြူ နီ ရယ်၊ ပုဇွန်ခြောက်ထောင်းရယ်၊ ငါးပိရယ်၊ ငံပြာရည်ရယ်၊ အချိုမှုန့်ရယ် ထည့်ပြီး ဒီအတိုင်း လုံးလိုက်ပါ။ (လုံးတယ်ဆိုတာ မီးပေါ်တင်ပြီး ဒီအတိုင်း သပွတ်သီးနဲ့ချဉ်ပေါင်အိသွားအထိပါ။) ပြီး ရေနွေးထည့်ပြီး ဆူတဲ့အထိ မီးဖိုပေါ်တင်ထားလိုက်ပါ။ မီးဖိုပေါ်ကနေ ချခါနီးမှ နံနံပင်ကို အုပ်လိုက်ပါ။ အရသာ ရိုးရိုးရှင်းရှင်းနဲ့ သပွတ်သီးချဉ်ဟင်းရပါပြီနော်။

သားပြွင်းဟင်းအတွက်လိုအပ်သောအရာ

သပွတ်သီး ၂ လုံး (ဂိုးဒင်းမိုင်း ပလာဇာကနေ ၀ယ်လာပါတယ်။၎ လုံးဝယ်လာတာ နှစ်လုံးဆီ တစ်ခါတစ်မျိုးဆီ ချက်စားလိုက်ပါတယ်နော်။)
ချဉ်ပေါင် ၁ စည်း၊ ၁ ထုပ်
ခရမ်းကျွတ်သီး သေးသေး ၁၅ လုံး (ဂိုးဒင်းမိုင်း ပလာဇာကနေ ၀ယ်လာပါတယ်)
ပုဇွန်ခြောက်ထောင်း (သို့) ငါးအသား ၂ တုံး
ကြက်သွန်ဖြူ ၅ တက်
ကြက်သွန်နီ ၁ လုံး
ငါးပိ လက်တစ်ဆစ်
နံနံပင်
ငရုတ်သီးစိမ်းတောင့် (မိမိလိုသလောက်ထည့်ပါ။)

သားပြွင်းဟင်းချက်ပုံ

ချဉ်ပေါင်ကို အရွက်တင်ပြီးသား ပင်နီဆိုလာက ၀ယ်လာပါတယ်။ ပြီးရေစင်စင်ဆေးပါတယ်။ သပွတ်သီးကို ဓားနဲ့ အခွံခြစ်ပါတယ်။ အခွံမနွှာပါဘူး။ ခြစ်ရုံပဲခြစ်တာပါ။ ပြီး အ၀ိုင်းလိုက်လှီးလိုက်ပါတယ်။ ခရမ်းကျွတ်သီးကို ၂ ခြမ်းစီ ခြမ်းပြီး ရေစိမ်ထားလိုက်တယ်။ ရေမစိမ်ထားရင် မည်းသွားလို့ပါ။ ကြက်သွန်ဖြူ နီတို့ကို ထောင်းလိုက်တယ်။ ငါး ၂ တုံးကို ကြော်လိုက်ပါတယ်။ ပြီး အရိုးနွှင်ပါတယ်။ ပြီး ချက်မယ့်အိုးထဲသို့ ဆီနည်းနည်းထည့် ကြက်သွန်ဖြူ နီထောင်းကိုထည့် ဆီသတ်လိုက်တယ်။ ပြီး အရောင်တင် အနီမှုန့် နဲ့ ဆနွင်းနည်းနည်းဆီထည့်၊ ငါးပိထည့်၊ ငံပြာရည်ထည့်လိုက်တယ်။ ပြီး အရိုးနွှင်ထားတဲ့ ငါးကိုထည့်လိုက်တယ်။ ပြီး ချဉ်ပေါင်ကိုအရင်ထည့် အိအောင်အထိထားလိုက်တယ်။ ချဉ်ပေါင်အိသွားရင် သပွတ်သီး နဲ့ ခရမ်းကျွတ်သီးကိုထည့်လိုက်တယ်။ ဗွက်ဗွက် ........... ဗွက်ဗွက် ဆူတဲ့အထိ တည်ပေးပါ။ ပြီး ငရုတ်သီးစိမ်းထည့်ပါ။ မီးဖိုပေါ်က ချခါနီး နံနံပင်အုပ်ပေးပါ။ ဒါဆိုရင်တော့ သပွတ်သီး သားပြွင်းဟင်း ရပါပြီနော်။


ကျန်းမာ ချမ်းသာကြပါစေ။

Tuesday, May 17, 2011

သင်္ဘောသီးကြော် (သို့) သဘောင်္သီး ကမောင်းကြော်

သင်္ဘောသီး အစိမ်းတစ်လုံး sheng siong ကနေ ၀ယ်ထားတာရှိတယ်။ ၀ယ်လာတုံးကတော့ သင်္ဘောသီးသုပ် (သို့) အစုံသုပ် လုပ်စားမယ်ဆိုပြီး ၀ယ်လာတယ်။ သင်္ဘောသီးသုပ် လုပ်စားမယ်ဆိုရင် အဆာပလာတွေပါ အစုံလုပ်ရမယ်။ အဆာပလာ မစုံပြန်ရင်လည်း စားမကောင်းဘူး။ အဆာပလာဆိုလို့ အာလူးနဲ့ ပဲကြာဇံပဲရှိတယ်။ နောက်ထပ်လည်း သွားဝယ်ရမှာ ပျင်းပြီ။ နဂိုကတည်းက အပျင်းကလည်း ပေါ်နေတော့ သင်္ဘောသီးသုပ် လုပ်မစားတော့ဘဲ စိတ်ကူးပြောင်းလိုက်တယ်။ သင်္ဘောသီးကြော်က အဆာပလာတွေ ဘာမှ ထူးထူးခြားခြားလဲ ထည့်စရာမလိုဘဲ သူ့ကျည်းပဲကြော်စားတာပါ။ ကြော်စားတဲ့ အရသာက ချိုလဲချိုပါတယ်။ သဘောင်္သီးကြော်ကို ရေနွေးခြမ်းလေး အဆာပြေစားစား၊ ဒါမှမဟုတ် ထမင်းခြမ်းအေးအေးနဲ့ တွဲပြီးစားစား အလွန် ကောင်းပါတယ်။  ဒီနေ့တော့ သင်္ဘောသီးကြော် (သို့) ကမောင်းကြော် ကို အားမနာတမ်း သုံးဆောင်သွားပါအုံးလား။




သဘောင်္သီးကြော်ရယ်၊ မန်ကျည်းမှည့်အချဉ်ရည်ရယ်၊ ရေနွေးကြမ်းရယ်

အကြော်အိုးပေါ်က ချချခြင်း သဘောင်္သီးကြော်ပါ
ဗမာနံနံပင်လေးပါ ထည့်ထားတဲ့ မန်ကျည်းမှည့် အချဉ်ရည်ပါ
သဘောင်္သီးခြစ်ထားတာကရယ်၊ ကြက်သွန်နီပါးပါးရယ်(လေတိုက်ရင်လွင့်မတတ် လှီးထားပါတယ်။ :D ) ၊ ကြက်သွန်ဖြူထောင်းရယ် (ဆန်စိမ်းမှုန့်အောက် ရောက်နေပါတယ်။) ၊ ငရုတ်သီးစိမ်းပါးပါးရယ် (ကတ်ကြေးနဲ့ လက်တစ်ဆစ်စာလောက် ညှပ်ထားပါတယ်။ :D ၊ ဆန်စိမ်းမှုန့်ရယ်၊ ဆားရယ်၊ အချိုမှုန့်ရယ်
သဘောင်္သီးအစိမ်းကို ရေဆေးပြီး ခြစ်ထားတယ်။
အဆာပလာတွေထည့်ပြီး နယ်ပြီးပုံ
ယိုးဒယားတံဆိပ် ဆန်စိမ်းမှုန့်
သင်္ဘောသီး ကြော်အတွက် လိုအပ်သောအရာ

သဘောင်္သီး အစိမ်း ၁ လုံး
ကြက်သွန်နီ ကြီးကြီး ၃ လုံး
ကြက်သွန်ဖြူ ၇ တက်
ဆန်စိမ်းမှုန့် (ယိုးဒယားတံဆိပ် ဆန်စိမ်းမှုန့် သုံးပုံ တစ်ပုံထည့်လိုက်ပါတယ်။ ဆန်စိမ်းမှုန့် ခပ်ထွေးထွေးလေး စားချင်ရင်တော့ ပိုထည့်ရင် ရပါတယ်နော်)
ငရုတ်သီးစိမ်း (မိမိစိတ်ကြိုက်ထည့်ပါ။ မထည့်လဲ ရပါတယ်နော်။)


သဘောင်္သီးကြော်ရန် အဆာပလာနယ်နည်း

သင်္ဘောသီးကို အခွံနွှာပါ။ ပြီးရင် ရေဆေးပြီး သင်္ဘောသီးခြစ်နဲ့ ခြစ်ပါ။ ပြီး နယ်မယ့် ဇလုံထဲသို့ သဘောင်္သီးခြစ်ထားတာကရယ်၊ ကြက်သွန်နီပါးပါးရယ်၊ ကြက်သွန်ဖြူထောင်းရယ်၊ ငရုတ်သီးစိမ်းပါးပါးညှပ်ထားတာရယ်၊ ဆန်စိမ်းမှုန့်ရယ်၊ ဆားရယ်၊ အချိုမှုန့်ရယ် နယ်ပေးပါ။ အရအသာ အနေတော် သိချင်ရင်တော့ သဘောင်္သီးနယ်ထားတာကို လက်ညှိးနဲ့ တို့ပြီး ဆားပြား အနေတော် ဟုတ်မဟုတ် မြည်းကြည့်ပါ။ အရသာလဲ အနေတော်ဖြစ်ရင်တော့ ကြော်မယ့် ဒယ်အိုးထဲ ဆီထည့်ပြီး ကြော်နိုင်ပါပြီနော်။ ဒါဆိုရင်တော့ သဘောင်္သီးကြော် (သို့) သဘောင်္သီး ကမောင်းကြော် ရပါပြီနော်။


ကျန်းမာ ချမ်းသာကြပါစေ။

Monday, May 2, 2011

မိုးကောင်း မုန့်ညှင်းပေါင်း

ခုတစ်ခေါက်အမေ့အိမ်ပြန်တော့ မုန့်ညှင်းပေါင်း ၂ ခါ ပေါင်းစားခဲ့တယ်။ ဒီမှာက မုန့်ညှင်းပေါင်းချင်ရင် မုန့်ညှင်းဖူးသိပ်မတွေ့လို့ မပေါင်းစားဖြစ်ခဲ့ဘူး။ ယိုးဒယား ပလာဇာမှာတော့ မုန့်ညှင်းဖူးခပ်သေးသေးတွေ တွေ့တယ်။ အဲဒီ အဖူးတွေကိုပေါင်းစားပြန်ရင်လဲ မုန့်ညှင်းအရိုးကြီးပဲ စားရတာများမှာ။ အရွက်နဲ့ မုန့်ညှင်းရိုးက ခပ်ပိန်ပိန်လိန်လိန်မို့ ၀ယ်ပြီး မပေါင်းစားဖြစ်ခဲ့ဘူး။ မုန့်ညှင်းပေါင်းစားရတဲ့ မုန့်ညှင်းဖူးက အရိုးကလဲ ခပ်တုပ်တုပ်၊ အရွက်ကလဲ နုနုထွားထွား အဲဒါမှ ပေါင်းစားရတာ အရမ်းချိုတာ။ ကျွန်မတို့က မုန့်ညှင်းပေါင်းစားရင် မုန့်ညှင်းကို ထိပ်ပိုင်းလေးပဲ ဓားနဲ့ဖြတ်ပြီး အပင်လိုက် အစည်းလိုက်ပေါင်းစားကြတယ်။ မုန့်ညှင်းပေါင်း စားပုံစားနည်းကလဲ ရှိသေးတယ်။ မုန့်ညှင်းအရိုးထိပ်ကို ပါးစပ်နဲ့ကိုက်ပြီး အရွက်နဲ့မုန့်ညှင်းရိုးက အဆီအနှစ်တွေကို လက်နဲ့ဆွဲစားတယ်ပြောမလား၊ ညစ်စားတယ်ပြောမလား၊ ဖြစ်စားတယ်ပြောမလား အဲလိုစားကြတယ်။ အရသာ အလွန်ရှိတာ။ ကျွန်မတို့က မုန့်ညှင်းပေါင်းနဲ့ တွဲစားတဲ့ မပါမဖြစ်ကလဲ ရှိသေး။ သူကတော့ ခရမ်းချဉ်သီး ပန်ထရွေဖျော်ပေါ့။ မုန့်ညှင်းပေါင်းကို ခရမ်းချဉ်သီး ပန်ထရွေဖျော်နဲ့တွဲပြီး စားလိုက်ရရင် လျှာ ဂျွမ်းပြန်ပြီး လည်ထွက်သွားလိမ့်မယ်နော့်။ မိုးကောင်းသူတို့ ကိုယ့်ငါးချဉ် ကိုယ် တအားကိုချဉ်ပလိုက်တယ်။ ဟဲဟဲ........... ။ အခါးရည် ရေနွေးကြမ်း တွဲသောက်ပါတယ်နော့်။ မုန့်ညှင်းပေါင်းကို ဒီလင့်မှာလည်း တစ်ခါတင်ဖူးပါတယ်နော်။ ဒီနေ့တော့ အမေ့အိမ်မှာ စားခဲ့တဲ့ မုန့်ညှင်းပေါင်းကို အားမနားတမ်း သုံးဆောင်သွားပါအုံးလား။



မုန့်ညှင်းပေါင်း နဲ့ ခရမ်းချဉ်သီး ပန်ထရွေဖျော်ရှိရင် ကျန်တဲ့ ဟင်းတွေတောင်မလိုပါဘူးနော်။ ထမင်းကို နည်းနည်းပဲ စားပါတယ်။ မုန့်ညှင်းပေါင်းကိုပဲ အားထားပြီး အ၀အပြဲ စားပလိုက်တယ်။


ရရချင်း ပူပူနွေးနွေး မုန့်ညှင်းပေါင်းပါ။


ဒါတော့ မုန့်ညှင်းပေါင်းနဲ့ တွဲစားမယ့် ခရမ်းချဉ်သီးပန်ထရွေဖျော်ပါ။


ပိုများလှမလားလို့ အလင်းဖွင့်ပြီး ရိုက်ကြည့်လိုက်တယ်။


ပထမ တစ်ခါ မုန့်ညှင်းပေါင်းအိုး (စားလို့ ကုန်ခါနီးမှ ဓာတ်ပုံ ရိုက်လိုက်တယ်)

ဒုတိယ တစ်ခါ အငွေ့တစ်ထောင်းထောင်း နဲ့ မုန့်ညှင်းပေါင်းအိုး

မုန့်ညှင်းပေါင်းအတွက် လိုအပ်သောအရာ

မုန့်ညှင်းဖူး ၅ စည်း (မုန့်ညှင်း ရွေးနည်းကတော့ မုန့်ညှင်းစည်းထားတဲ့ဖက်ကနေ ကိုင်လိုက်ပါ။ မုန့်ညှင်းစည်းကို ကိုယ်လိုရာဘက် ယိမ်းနွဲ့ကြည့်လိုက်ပါ။ ပျော့ပျော့ ပျောင်းပျောင်းနဲ့ ကိုယ် ယိမ်းသလို နွဲ့နွဲ့နှောင်းနှောင်းနဲ့ ယိမ်းရင်တော့ မုန့်ညှင်း နုတယ်လို့ပြောလို့ရပါတယ်နော်။)
ဆန်မုန့် (သို့) ဆန်လှော်မုန့်
ကြက်သွန်နီ ၇ လုံး
ကြက်သွန်ဖြူ ၂ ဥ
ငရုတ်သီးစိမ်း (မိမိ လိုသလောက်ထည့်ပါ။)
ပုဇွန်ခြောက် (ရှင်းရှင်းလေးစားချင်ရင် တစ်ချို့လဲ မထည့်ဘူး။)
ငါးပိစိမ်း(သို့)ငါးပိဖုတ်
ဆီ
ငှက်ပျောဖက် (သို့) အ၀တ်စ ပါးပါး



မုန့်ညှင်းကို ထိပ်ပိုင်းလေးပဲဖြတ်ပြီး ရေစင်စင်ဆေးပါ။ အရှည်လိုက် မုန့်ညှင်းရိုးလေးကိုဆွဲဆွဲပြီး စားရတာကို ပိုပြီးအရသာရှိတယ်။ မုန့်ညှင်းကို ရေဆေးပြီး ရေစစ်ထားပါ။ ကြက်သွန်နီ၊ ကြက်သွန်ဖြူ၊ ပုဇွန်ခြောက်၊ ငါးပိ၊ ငရုတ်သီး တို့ကို ရောပြီးထောင်းထားပါ။ ဇလုံတခုထဲသို့ မုန့်ညှင်းထည့်၊ ထောင်းထားသော ကြက်သွန်နီ၊ ကြက်သွန်ဖြူ၊ ပုဇွန်ခြောက်၊ ငါးပိ၊ ငရုတ်သီးတို့ကိုထည့်၊ ဆားအနည်းငယ်၊ အချိုမှုန့်အနည်းငယ်၊ ဆီစိမ်း အနည်းနယ်၊ ဆန်မုန့်(သို့) ဆန်လှော်မုန့် ထည့် လက်အိတ်စွပ်ပြီး နာနာနယ်ပေးပါ။ လက်အိတ်စွတ်တာက ငရုတ်သီးပါလို့ လက်ပူမှာစိုးလို့ပါ။ အရသာအပေါ့အငံမြည်းကြည့်ချင်လဲ လက်ညိုးလေးနဲ့တို့ပြီး မြည်းကြည့်ပါ။ ကျွန်မကတော့ မြည်းကြည့်လိုက်တယ်။ တော်နေ ပေါင်းပြီးမှ အစပ်ဟတ်မတည့်မှာစိုးလို့ပါ။ အားလုံးအဆင်ပြေသွားပြီဆိုရင်တော့ ထမင်းအိုးရဲ့အန်၊ ပေါင်းချောင်လေးမှာ ငှက်ပျောဖက်(သို့) အ၀တ်စပါးပါး ကိုအောက်ကခင်းပြီး စောစောက နယ်ထားသော မုန့်ညှင်းကိုတင်ပါ။ ထမင်းပေါင်းအိုးလေးရဲ့ အန်လေးနဲ့ပေါင်းစားလဲ အဆင်ပြေပါတယ်။ ကဲ ထမင်းအိုးထဲကို ရေထည့်ပြီး နာရီဝက်၊ ၁ နာရီလောက် နူးအိနေအောင်တည်ထားပါလေ။ အနံများလဲမွှေးကြိုင်လာပြီဆိုရင်တော့ မုန့်ညှင်းပေါင်း ရပါပြီနော်။ ကဲ သုံးဆောင်သွားပါအုံးလား။

(အစပ်မကြိုက်သူများ ငရုတ်သီးမထည့်လဲရတယ်နော်။ ကျွန်မကတော့ ဘာဟင်းနေနေ ငရုတ်သီးစပ်စပ်လေး ထည့်တတ်တယ်။ ငှက်ပျောဖက်မရှိလဲ အလူမီနီယမ်ပြားသန့်သန့်လေးနဲ့ခင်းလို့ရပါတယ်နော်)


ကျန်းမာ ချမ်းသာကြပါစေ။

Sunday, April 17, 2011

ငါးပိတစ်ချက်


ဒီအပတ် ရုံးပိတ်ရက် ငါးပိတစ်ချက် ချက်စားတာကို တင်လိုက်ပါတယ်နော်။ ငါးပိတစ်ကို ရိုးရိုး ရှင်းရှင်းချက်စားလို့ ရသလို၊ အုန်းနို့နဲ့လည်းချက်စားလို့ ရပါတယ်။ အုန်းနို့နဲ့ချက်တာကို အလှူ ငါးခြောက်ချက်လို့လဲ ခေါ်ကြတယ်။ ချက်စားတာမဟုတ်လဲ ငရုတ်သီး ခွဲခြမ်းဖတ်နဲ့ ခပ်စပ်စပ်လေး ကြော်စားလဲ ရပါတယ်။ ခုတစ်လော ရာသီဥတုကလည်း ပူတာမို့ အုန်းနို့နဲ့မချက်ဘဲ ရိုးရိုး ငါးပိတစ်ချက်ပဲ ချက်စားလိုက်ပါတယ်နော်။ နောက်တစ်ခါမှ အုန်းနို့နဲ့ချက်ပြီး ထပ်တင်ပါအုံးမယ်နော်။ ဒီနေ့တော့ ထမင်းမြိန်စေ့မယ် ငါးပိတစ်ချက် ခပ်စပ်စပ်လေးပဲ အားမနာတမ်း သုံးဆောင်သွားပါအုံးလား။


သခွားသီးအတို့ရယ်၊ ငါးပိတစ်ချက်ရယ်၊ မုန်လာဥချဉ်ဟင်းရယ်၊ သရက်သီး ငါးပိချက်ရယ်၊ ငါးရံ့ခြောက်ဖုတ်ရယ်၊ ငါးပိသုပ်ရယ် (အငန်တွေကြီးပဲ။ စားပြီးရင်တော့ သွေးတွေတက်လို့ အိပ်နေရုံပဲ။ :D )


ငါးပိတစ်ချက်ရယ်၊ သခွားသီးအတို့ရယ်၊ ၀က်သားနဲ့ခရမ်းသီးအရောချက်ရယ်၊ ပဲဟင်းရယ် (ပထမရက်က ဟင်းပါ)



ငါးပိတစ်ချက်


မုန်လာဥ ချဉ်ဟင်း



ထမင်းမစားခင် အားနေတာနဲ့ ပုံစံခွက်ထဲ ထည့်ပြီး ပုံဖော်ထားတယ်။ ဟဲဟဲ.........

ငါးပိတစ်ချက်အတွက် လိုအပ်သောအရာ

ငါးပိတစ်ခြောက် (shing song ကနေ ၀ယ်လာတာပါ။ ငမန်း ငါးခြောက်လို့ ရေးထားပါတယ်။အသားတွေကြီးပဲ တုံးထားတာပါ။ စားလို့ကောင်းတယ်။)
ခရမ်းချဉ်သီး ကြီးကြီး ၇ လုံး
ကြက်သွန်ဖြူ ၁ ဥ
ငါးပိစိမ်း လက်တစ်ဆစ်
ငရုတ်သီးစိမ်း (မိမိလိုသလောက်ထည့်ပါ)
ဗမာ နံနံ

ငါးပိတစ်ချက် ချက်ပုံ

အရင်ဆုံး ငါးပိတစ်ချက်ကို ၁ နာရီလောက် ရေစိမ်ထားပေးပါ။ အငန်တွေထွက်သွားအောင်လို့ပါ။ ပြီး ခ၇မ်းချဉ်သီးကို မထူ မပါး လှီးထားပါ။ ကြက်သွန်ဖြူကို ထောင်းထားပါ။ ငရုတ်သီးစိမ်း နဲ့ နံနံပင် ကိုလည်း လှီးထားပါ။ ငါးပိတစ်ချက်မယ့် အိုးတည်ပါတော့မယ်။ ဆီ နည်းနည်ထည့်ပါ။ ဆီကျက်ရင် ခရမ်းချဉ်သီးထည့်၊ ကြက်သွန်ဖြူထည့်၊ ငါးပိထည့်၊ ငရုတ်သီး အရောင်တင်မှုန့်ထည့်၊ ဆနွင်းမှုန့်ထည့်၊ အချိုမှုန့်ထည့်ပြီး ခရမ်းချဉ်သီး အိသွားအောင်အထိ ချက်ပေးပါ။ ခရမ်းချဉ်သီးလည်း ဗွက်ဗွက် ၊ ဗွက်ဗွက်ဆိုပြီး အသံတွေ ကြားရင် မွှေမယ့် ဇွန်းနဲ့ ခရမ်းချဉ်သီးများ ကြေသွားအောင် မွှေပေးပါ။ ပြီး ဆီပြန်လာရင် ရေစိမ်ထားတဲ့ ငါးပိတစ်ကို ထည့်ပေးပါ။ ပြီး ရေနွေး လက်တစ်ဆစ်လောက် ငါးပိတစ်မြုပ်အောင် ထည့်ပါ။ ပြီး ဆီပြန်လာအောင်ထားပါ။ ဆီပြန်လာရင် ငရုတ်သီးစိမ်းထည့်၊ နံနံပင်ထည့်ခဏထားပြီး မီးဖိုပေါ်ကနေ ချလို့ ရပါပြီနော်။ ထမင်းမြိန်စေမယ့် ငါးပိတစ်ဟင်းတစ်ခွက် ရပါပြီ။


ကျန်းမာ ချမ်းသာကြပါစေ။



Saturday, April 16, 2011

ပဲမြစ်ပြုတ်


အမေ့အိမ်ပြန်တုံး ရိုက်ခဲ့တဲ့ ဓာတ်ပုံတွေကိုအလွမ်းပြေ ကြည့်ရင်း ပဲမြစ်ပြုတ်ကိုပါ ဓာတ်ပုံရိုက်ထားတာ တွေ့တာနဲ့ စားချင်စိတ်ဖြစ်လာတယ်။ ဟင်းအသစ်လဲ မတင်ဖြစ်တာ ကြာနေပြီ။ ဟင်းအသစ်လဲ ချက်နည်းတွေနဲ့ ဘာနဲ့ ညာနဲ့ အရှည်ကြီးရေးရမှာ ပျင်းတင်းတင်းမို့ တိုတို တုပ်တုပ်ဖြစ်မယ့် ပဲမြစ်ပြုတ် ငုပ်တိုတွေကို တင်လိုက်ပါတယ်နော်။ ပဲမြစ်ပြုတ်နည်းတော့ မရေးလိုက်တော့ဘူးနော်။ ဒီနေ့တော ပဲမြစ်ပြုတ်လေးပဲ အားမနာတမ်း သုံးဆောင်သွားပါအုံးလား။


ပဲမြစ်ပြုတ်ရယ်၊ ဆီနဲ့ဆားနဲ့ပန်းကန်ရယ်၊ ရေနွေးကြမ်းရယ် (ပဲမြစ်ပြုတ် ငုပ်တိုတွေက စီးသလားတော့ မမေးနဲ့နော်။ မန်ကျည်းတော ပဲမြစ်စစ်စစ် :D)


စားချင်စိတ်တွေ တစ်ဖွားဖွားဖြစ်လာအောင် အနီးကပ်


ကြီးတော်က ဘေးကနေပြီး စတင်ထုနေပါပြီ။ ထုထားတာကို ဘေးကနေ အသာလေး ၀င်စားလိုက်ရုံပါပဲ။
ဟဲဟဲ ......


ပဲမြစ်ပြုတ် ဆီလူး (သို့) ဆီပါလေရုံပွတ်


ညကြတော့ လေလဲပွားရင်း လက်ကျန်ပဲမြစ်ပြုတ် ငုပ်တိုရယ်၊ ပူတင်းရယ်၊ ကျောက်ကျောရယ်၊ မုန့်လင်မယား(သို့) မုန့်မောင်နှမရယ် ထပ်မှန်ပြီး စားကြတယ်။


မုန့်လင်မယား (သို့) မုန့်မောင်နှမ အနီးကပ်


ကျန်းမာ ချမ်းသာကြပါစေ။

Monday, March 21, 2011

အအုံး (ခေါ်) ဟင်းပေါင်းထုပ် (ကြက်၊ငါး၊ပုဇွန်)



ဒီနေ့လည်း အမေ့အိမ်မှာစားခဲ့တဲ့ ကြက်အုံး (ခေါ်) ကြက်ပေါင်းထုပ်၊ ငါးအုံး (ခေါ်) ငါးပေါင်းထုပ်၊ ပုဇွန်အုံး (ခေါ်) ပုဇွန်ပေါင်းထုပ် စတဲ့ အအုံးပေါင်းစုံ (ခေါ်) အပေါင်းထုပ် အစုံစုံ တင်လိုက်ပါတယ်နော်။ လာလည်တဲ့သူတွေတော့သိဘူး ကျွန်မတော့ ကိုယ်တင်တဲ့ ဓာတ်ပုံတွေပြန်ကြည့်ပြီး ပြန်စားချင်တယ်။ အမေ့အိမ် မပြန်ခင်တော့ ဒါလေးစားမယ်၊ ဟိုဟာလေးလည်းစားမယ် ဆိုပြီး စားမယ့်စားရင်းတွေကို မှတ်ထားတယ်။ တကယ်လည် ပြန်ရောက်ရော ထင်ထားသလောက် အကုန်မစားနိုင်ဘူး။ အချိန်တွေ အများကြီး မရတာလည်း ပါတာပေါ့လေ။ ဒီလည်းပြန်ရောက်ရော ဒီဟာတော့ ငါမစားခဲ့ရဘူး၊ ဟိုဟာတော့ ငါမစားခဲ့ရဘူးပေါ့။ ဒါတောင် အချိန်ရှိသမျှ စားနေတာ လူလည်း လုံးတုပ်ပြီး ပါသွားတဲ့အင်္ကျီ၊ ဘောင်းဘီတွေတောင် ချက်ချင်း လက်ငင်း ကြပ်သွားတဲ့အထိပဲ။(တကယ်ပါ လုံးဝ လုံးဝ မပို မပြောပါဘူး။) ဟဲဟဲ။ ဒါတောင် ဒီတစ်ခေါက် ၀က်သားစတူးတောင် သိပ်မစားခဲ့ဘူး။ ငါးတွေကြီးပဲ လိမ့်ပိန့် စားခဲ့တယ်။ ငါးကျည်းကြော်၊ ငါးသလဲတိုးကြော်၊ ငါးမွေတိုးကြော်၊ ငါးဖယ်ကြော်၊ ငါးဖယ်ချက်၊ ငါးသလောက်ချက်၊ ငါးရံ့ချက်၊ ငါးရံ့ခြောက် ဆီဆမ်း၊ အာဗြဲခြောက် ဆီဆမ်း၊ ငါးကြင်း ကချင်ချက်၊ ငါးကြင်း ကချင်ကြော်၊ ငါးကြင်းအုံး (ခေါ်) ငါးကြင်း ပေါင်းထုပ်၊ ငါးရံ့ခေါင်း ချည်ဟင်းချက်၊ ငါးခေါင်းဟင်းရည် (ငါးတန်ခေါင်း)၊ ငါးလေး ပေါက်စ ဖြူဖြူ ချည်ဟင်းချက် (အဲဒီ ငါးနာမည် မသိ) အဲဒါတွေ စားခဲ့တယ်။ အဟီး...... ။

သြော် စားခဲ့တဲ့ ငါးတွေအကြောင်း ကြွားနေ၊ ဟဲဟုတ်ပေါင် ပြောနေတာနဲ့ ပေါင်းထုပ်အကြောင်းတောင် ဘယ်ရောက်သွားမှန်းမသိတော့ဘူး။ အမေ့အိမ်မှာက ဆီပြန်ဟင်းတွေ ချက်စားတာထက် ဒီလို အုံးမယ်၊ ပေါင်းမယ်၊ ကြော်မယ်၊ လှော်မယ်၊ ထောင်းမယ် အဲတာတွေ လုပ်စားတာများတယ်။ အဲဒီနေ့ကလည်း အမေ့ဘေးနားက တောက်တို မယ်ရလုပ်ပေးပြီး အပေါင်းရတာနဲ့ တို့အမေရဲ့ ဟင်းပေါင်းထုပ် အရသာ အနေတော်မှ ဟုတ်ရဲ့လားဆိုပြီး တစ်ထုပ်ပြီး တစ်ထုပ် ပလက်စတစ်နှီးကြိုး ဖြေပြီး ရေနွေးကြမ်းလေး နဲ့ စားတော့တာပါပဲ။ အင်း ............. အမေရေ .......... ကြက်ပေါင်းထုပ်ကတော့ ပုံမှန်ပါပဲ။ အလှည့် .......... အဲလို အဲလို။ ငါးပေါင်းထုပ် နဲ့ ပုဇွန်ပေါင်းထုပ်ကတော့ ရှယ်ပဲ အမေ ဆိုပြီး တစ်ခါတည်းစားလိုက်တာ သုံးထုပ်စလုံး ပြောင်းသွားပါလေရောလား။ ဒါနဲ့ နေ့လည်စာ ထမင်းစားတဲ့အခါမှ စားတော့မယ်ဆိုပြီး အောက်မေးရိုးကို ခဏအနားပေးလိုက်ရပါတော့တယ်။ နောက်နေ့များမှာလည်း အမေ့အိမ်က စားခဲ့သမျှ တင်ပါအုံးမယ်နော်။ ဒီနေ့တော့ ကြက်အုံး၊ ငါးအုံး၊ ပုဇွန်အုံးတွေကို အားမနာတမ်း သုံးဆောင်သွားပါအုံးလား။



ပေါင်းအိုးထဲက အထုပ်များ (ကြက်၊ငါး၊ပုဇွန်)


ရေသတ္တ၀ါ နှစ်ကောင်ကို ပလက်စတစ် နှီးကြိုးအပြာရောင် ၊ နှီးကြိုးအနီရောင်နဲ့ ခွဲထားတယ်။ အပြာရောင်နှီးကြိုးက ငါး၊ အနီရောင်နှီးကြိုးက ပုဇွန်၊ ဘာနှီးကြိုးမှ မချေထားတာက ကြက်သားပါ။ မိမိ စားချင်တဲ့အထုပ် ယူစားသွားပါ။


ကြက်အုံး (ခေါ်) ကြက်ပေါင်းထုပ်


ငါးအုံး (ခေါ်) ငါးပေါင်းထုပ်


ပုဇွန်အုံး (ခေါ်) ပုဇွန်ပေါင်းထုပ်


ဒါတော့ ထမင်းစားတဲ့အခါ သုံးမျိူးစလုံးပေါင်းထည့်လိုက်တယ်။


ဖက်ဖယ်ရွက် (ဒီမှာတော့ laksa leave ဆိုပြီးရောင်းတယ်။ ယိုးဒယားပလာဇာ ဂိုးဒင်းမိုင်း ဆိုင်တွေမှာလဲ ၀ယ်လို့ ရပါတယ်။) ဒီလင့် မှာလဲ ကျွန်မသိသော အရွက် အမွှေးအကြိုင်များကို ပုံနှင့်တကွတင်ဖူးပါတယ်။


ရှမ်းနံနံ

ပင်စိမ်းရွက်


အအုံး ၊ အပေါင်း လုပ်နည်းအတွက် လိုအပ်သောအရာ

ကြက်သား ၅၀ ကျပ်သား(ရင်ဖုံသား) (ကျွန်မတော့ ကြက်သားဆို အရိုးပိုကြိုက်ပါသည်။)
ငါးကြင်း ၅၀ ကျပ်သား
ပုဇွန် ၅၀ ကျပ်သား
ကြက်သွန်နီ ဥကြီး အလုံး ၂၀
ကြက်သွန်ဖြူ ၁၀ ဥ
ရှမ်းနံနံ ၃ စည်း (အစည်းကြီးကြီး)
ဗမာနံနံ ၃ စည်း (အစည်းကြီးကြီး)
ပင်စိမ်း ၃ စည်း (အစည်းကြီးကြီး)
ဖက်ဖယ် ၃ စည်း (အစည်းကြီးကြီး)
ငရုတ်သီး (မိမိ စိတ်ကြိုက် ထည့်ပါ။)
ဂျင်း တစ်တက်
ဆီ အနည်းငယ်
ငှက်ပျောဖက်


ပြုလုပ်ပုံ

ကြက်ကို ရေစင်အောင်ဆေးပြီး ခပ်သေးသေးတုံးထားပါ။ ငါးကြင်းကိုလည်း ငါးနံ့မနံရလေအောင် မန်ကျည်းမှည့်ရည်နဲ့ ရေစင်စင်ဆေး ပြီးခပ်သေးသေးတုံးထားပါ။ ပုဇွန်ကိုလည်း ရေစင်စင်ဆေးပြီး အခွံချွတ်ထားပါ။ ကြက်သားကိုလည်း ဇလုံ တစ်ခုတည်းထည့်ပြီး ဆား အချိုနယ်ထားပါ။ ငါးကိုလည်း ဇလုံ တစ်ခုတည်းထည့်ပြီး ဆား အချိုနယ်ထားပါ။ ပုဇွန်ကိုလည် ဇလုံ တစ်ခုတည်းထည့်ပြီး ဆား အချိုနယ်ထားပါ။ ပြီး အအုံး အပေါင်းထဲ ထည့်ဖို့ အစာပလာ လုပ်ပါတော့မယ်။ ကြက်သွန်ဖြူ၊ နီ၊ ဂျင်း၊ ရှမ်းနံနံ၊ ဗမာနံနံ၊ ပင်စိမ်း၊ ဖက်ဖယ်၊ ငရုတ်သီးစိမ်း တို့ကို လက်လှည့် ကြိတ်ဆုံနဲ့ ကြိတ်ပါတယ်။ မဟုတ်လဲ ထောင်းလို့ရပါတယ်နော်။ ပြီး ကျိတ်ထားတဲ့ အစာပလာ အားလုံးကို ဇလုံတစ်ခုထဲထည့်ပါ။ ပြီးဆား၊ အချိုမှုန့်၊ ဆီအနည်းငယ်ထည့်ပြီး နယ်ပေးပါ။ (တစ်ချို့ကလည်း အစာပလာထဲမှာ ဆန်စိမ်းမှုန့်ထည့်တတ်ပါတယ်။ မှုန့်နှစ်လေးနဲ့ ခပ်ထွေးထွေးလေး စားချင်ရင်တော့ ဆန်စိမ်းမှုန့်ပါ ထည့်ပြီး နယ်ပေးပါ။ အိမ်မှာတော့ မထည့်တတ်ပါဘူး။ ဒီအစာပလာတွေပဲ ထည့်ပါတယ်။) လက်ညိုးလေးနဲ့တို့ပြီး ဆား ပြား အနေတော် မြည်းကြည့်ပါ။ ငရုတ်သီးစိမ်းတော့ များများထည့်ကြိတ်လိုက်တယ်။ အအုံး(ခေါ်) အပေါင်းထုပ်ဟင်းက ခပ်စပ်စပ်လေးမှ အရသာအလွန်ရှိပါတယ်။ အစပ်ကလည်း ကျွန်မအကြိုက်ထည့်လိုက်ပါတယ်။ ဆား ပြား အနေတော် ဖြစ်ပြီဆိုရင် သုံးပုံခွဲပြီး ကြက်သားဇလုံ၊ ငါးဇလုံ၊ ပုဇွန် ဇလုံထဲသို့ အစာပလာထည့်ပြီး အသားနဲ့ အစာပလာ ရောသမသွားအောင် နယ်ပေးပါ။ ပြီးရင် ငှက်ပျောဖက်ထဲသို့ အနေတော်ထည့်ပြီး ထုပ်ပါ။ ပြီး နှီးချည်ပါ။ ပြီး ပေါင်းမယ့်အိုးထဲသို့ တန်းစီးပြီး စီစီရီရီ ထည့်ပြီး စတင်ပေါင်းနိုင်ပါပြီနော်။ နောက် တစ်နာရီလောက်ဆိုရင် ဟင်းပေါင်းထုပ် အနံ့လေး လည်း စတင်ရပါပြီနော်။ ငါးမှာ အနွေး၊ ပုဇွန်မှာ အကွေးဆိုတဲ့ ဆိုရိုးစကားရှိတယ်မဟုတ်လား။ ဒီတော့ ငါးနဲ့ပုဇွန်က အရင် ကျတ်တာပါတယ်။ ဒါဆိုရင်တော့ အအုံး (ခေါ်) အပေါင်းထုပ်ဟင်း ရပါပြီနော်။



ကျန်းမာ ချမ်းသာကြပါစေ။

Tuesday, March 8, 2011

ငပူသီးထောင်း


ဒီကိုပြန်လာတော့ အမေ့အိမ်ကနေ စားစရာတွေအများကြီး ထည့်ပေးလိုက်တယ်။ အဲဒီထဲမှာ ငပူသီးလဲ ပါတယ်။ ငပူသီးက ခရမ်းချဉ်သီး လိုပုံစံ၊ သိပ်တော့မကြီးဘူး ခပ်သေးသေး၊ အရောင်က ၀ါစိမ်းစိမ်းအရောင်ပါ။ ရန်ကုန်အခေါ် စိန်ခရမ်းချဉ်သီး ခေါ်လားတော့မသိဘူး။ သူ့ရဲ့ အရသာက ဗမာ ခရမ်းချဉ်သီးထက် ပိုပြီးချဉ်ပါတယ်။ အိမ်မှာတော့ ငပူသီးကို ထောင်းပဲစားတယ်။ ကျန်တာ ဘယ်လို လုပ်စားလို့ ရသေးလဲတော့ မပြောတတ်ဘူး။ ဟင်းချိုဟင်းရည်၊ ပဲဟင်းရည် စတဲ့ ဟင်းရည်တွေနဲ့ အလွန်လိုက်ဖက်လှပါတယ်။ ဒီနေ့လဲ ဆီမပါတဲ့ ငပူသီးထောင်းကို အားမနာတမ်း သုံးဆောင်သွားပါအုံးလား။



ငပူးသီးထောင်း၊ အမဲခြောက်ကြော်၊ ပဲနီလေးနဲ့ကြာဇံဟင်းရည်


ငပူသီးထောင်း (ဒါက အမေ့အိမ်မှာတုံးက စားခဲ့တဲ့ ငပူသီးထောင်းပါ။)


ငပူသီးထောင်း (ဒါက ကျွန်မထောင်းတဲ့ ငပူသီးထောင်းပါ။)


ငပူသီးကို အညှာဖြတ်၊ လေးခြမ်းစိတ်ပြီး ရေနည်းနည်းနဲ့ ခမ်းအောင် ပြုတ်လိုက်ပါတယ်။ (မီးသွေးမီးနဲ့ဆို ဖုတ်လို့၊ကင်လို့ လဲရပါတယ်နော်။)


ငပူသီးထောင်းအတွက် လိုအပ်သောအရာ

ငပူသီး ၁၀ လုံး
ကြက်သွန်ဖြူ ၁ ဥ
ပုဇွန်ခြောက် အနည်းငယ် (ရှင်းရှင်းလင်းလင်း စားချင်ရင်တော့ ပုဇွန်ခြောက်မထည့်လဲ ရပါတယ်နော်။)
ငရုတ်သီး ၁၀ တောင့်
ဆား အနည်းငယ်
အချိုမှုန့် အနည်းငယ်

ငပူသီးထောင်းပုံ
ပထမဦးဆုံး ငပူသီးကို အညှာဖြတ်၊ လေးခြမ်းစိတ် ရေဆေးလိုက်တယ်။ ပြီး ငပူသီးပြုတ်ပါတော့မယ်။ ပြုတ်မယ့်အိုးထဲသို့ ရေနည်းနည်းထည့်၊ ငပူသီးထည့်ပြီး ရေခမ်းနေအောင် ပြုတ်ပေးပါ။ ငပူသီးပြုတ် ရပြီဆိုရင်တော့ ထောင်းပါတော့မယ်။ ငရုတ်ဆုံထဲသို့ ကြက်သွန်ဖြူထည့်၊ ငရုတ်သီးစိမ်းထည့်၊ ပုဇွန်ခြောက်ထည့်၊ ဆားထည့်၊ အချိုမှုန့်ထည့် ပြီး အရင်ထောင်းလိုက်ပါ။ အားလုံး ညှက်သွားရင် ငပူသီးပြုတ်ကို ထည့်ပြီးထောင်းပါ။ ဆားလေး ပြားလေးမြည်းကြည့်ပါ။ ဆား ပြား အနေတော်ဖြစ်ရင်တော့ ခံတွင်းတွေ့စေမယ့် ငပူသီးထောင်း ရပါပြီနော်။


ကျန်းမာ ချမ်းသာကြပါစေ။

Sunday, February 27, 2011

နှင်းမှိုပေါင်း


ဒီနေ့တော့ ဆီမပါ ပြားမပါတဲ့ နှင်းမှိုပေါင်းဟင်း တင်လိုက်ပါတယ်နော်။ အမေ့အိမ်ပြန်တာ ဆောင်းတွင်းအချိန်ဆိုတော့ အသီးအရွက်တွေ၊ နှင်းမှိုတွေ၊ မုန့်ညှင်းတွေ ပေါတဲ့အချိန်ပေါ့။ မှိုကပ်ပေါင်း၊ နှင်းမှိုပေါင်း၊ မုန့်ညှင်းပေါင်းတွေ ကြိုက်တဲ့ ကျွန်မအတွက်တော့ အလွန်အင်မတန် ကောင်းလှပါတယ်။ ခုလဲ အမေက သမီးရေ....... ဒီနေ့ နှင်းမှိုပေါင်းစားမလားဟေ့ မေးတယ်။ ဒီတော့ မိုးကောင်းသူလဲ အောက်မေးရိုးလေး လုပ်ပြီး ဟုတ်ခဲ့အမေ အရည် ရွဲရွဲ နှစ်နှစ်လေးနဲ့ စားချင်တယ်လို့ အတွန့်တွေရော၊ အနားတွေရောပါတက်ပြီး ပြန်ဖြေလိုက်တယ်။ ဟဲဟဲ........။ ဒီနေ့တော့ နှင်းမှိုပေါင်းဟင်းကို အားမနာတမ်း သုံးဆောင်သွားပါအုံးလား။


နှင်းမှိုပေါင်းကို ရရချင်း ရေနွေးကြမ်းနဲ့ မြည်းလိုက်တယ်။ အလိုလေး ရှမ်းနံနံ အနံ့လေးကလဲမွှေးလို့။ ငရုတ်သီး စပ်စပ်လေးနဲ့မို့ ကောင်းမှကောင်း။ အခုတောင် ပြန်စားချင်တယ်။

ပိုပြီး သွားရည်ကြအောင် အနီးကပ် ရိုက်လိုက်တယ်။ :D



အနှစ်များများနဲ့မို့လို့ ပေါင်းအိုးမှာ ဒီလို ပေါင်းလိုက်ပါတယ်။ အနှစ်မများရင် ငှက်ပျောဖက်နဲ့ထုပ်ပြီး ပေါင်းလဲ ရပါတယ်နော်။ ငှက်ပျောဖတ်နံ့တောင် ပိုမွေးသေးတယ်။



အမေ လက်အိတ်စွတ်ပြီး ဆား ပြား အရသာဝင်အောင် ပယ်ပယ်နယ်နယ် နယ်နေပါပြီ။

နှင်းမှိုရယ်၊ ကြက်သွန်ဖြူ နီ ထောင်းရယ်၊ ငရုတ်သီးထောင်းရယ်၊ ဆန်လှော်မှုန့်ရယ်၊ ရှမ်းနံနံရယ်၊ ဆားရယ်၊ အချိုရယ် စတာတွေ ထည့်ပါတယ်။

နှင်းမှို


နှင်းမှိုပေါင်း အတွက်လိုအပ်သောအရာ

နှင်းမှို ၁ ပိသာ
ကြက်သွန်နီ ဥကြီး ၇ လုံး
ကြက်သွန်ဖြူ ၃ ဥ
ငရုတ်သီးစိမ်း မိမိစိတ်ကြိုက်ထည့်ပါ
ရှမ်းနံနံ ၂ စည်း
ဆန်လှော်မှုန့် မွှေး တံဆိပ် ၂ ထုပ် (အနှစ်မများချင်ရင်တော့ ၁ ထုပ်လောက်ထည့်လဲ ရပါတယ်နော်)
ဆား
အချိုမှုန့်


ပြုလုပ်ပုံ

ပထမဦးစွာ နှင်းမှိုကို သဲစင်အောင် အမြီးတွေကို ကတ်ကြေးနဲ့ သေသေချာချာ ဖြတ်ပါ။ ပြီး ရေစင်ကြယ်အောင်ဆေးပါ။ ပြီး မှိုပွင့်ကြီးလျှင် နှစ်ခြမ်းစီ ခွဲပြီး ရေစစ်ထားလိုက်ပါ။ ပြီး ကြက်သွန်ဖြူ နီ၊ ငရုတ်သီးစိမ်းတို့ကို ထောင်းထား၊ ကြိတ်ထားပါ။ ပြီး ရှမ်းနံနံကို ရေဆေးပြီး လက်တစ်ဆစ်စာ အနေတော်လောက် လှီးထား၊ ဖြတ်ထားပါ။မဟုတ်လဲ မိမိစိတ်ကြိုက် လှီး၊ ဖြတ်နိုင်ပါတယ်နော်။ အဆင်သင့်ဖြစ်ရင် ဇလုံကြီးကြီးတစ်ခုထဲသို့ အားလုံးထည့်ပြီး နယ်ပါတော့မယ်။ ဆား၊ အချိုမှုန့်၊ ဆန်လှော်မှုန့်တို့ကိုပါ တစ်ခါတည်း ထည့်ပြီး နယ်ပါ။ ပြီး စတီးဇလုံ(သို့)ကြွေဇလုံ ထဲ နယ်ထားတဲ့မှိုကို ထည့်ပြီး ပေါင်းချောင်ထဲ ထည့်ပြီး စတင်ပေါင်းနိုင်ပါပြီနော်။ ပေါင်းအိုးထဲ ရေထည့်ဖို့လဲ မမေ့နဲ့အုံးနော်။ နာရီဝက်လောက်ဆိုရင်တော့ အနံ့လေး စတင်ရလာပါပြီနော်။ ကျွန်မတော့ အနံ့ရလာတာနဲ့ အရသာ အနေတော်ဟုတ်မဟုတ် အဖုံးလေး ဖွင့်လိုက် မြည်းလိုက်၊ အဖုံးလေး ပြန်ပိတ်လိုက်နဲ့ စတင်အလုပ်ရှုပ်နေပါပြီ။ နှင်းမှိုလေးလဲ နူးအိသွားရင်တော့ စတင် နှင်းမှိုပေါင်း ရပါပြီနော်။ ရှမ်းနံနံအနံ့မွှေးမွှေး နဲ့ ငရုတ်သီးစပ်စပ်လေးနဲ့မို့ အလွန်ကို စားကောင်းလှတဲ့ နှင်းမှိုပေါင်း ဟင်းတစ်ခွက်ရပါပြီ။


ကျန်းမာ ချမ်းသာကြပါစေ။