ဓညှင်းသီးပြုတ် စားကြရအောင်လား

ဒီပိတ်ရက် စနေနေ့ ဓညှင်းသီးပြုတ်စားတော့ မေမေ ယောက်ခမကြီးကို သတိရမိတယ်။ ကိုယ်တော်ကြီးနဲ့ မရခင်တုံးကပေါ့။ ကိုယ်တော်ကြီးအိမ် ထမင်းစားအလည်သွားတယ်။ ကိုယ်တော်ကြီးမေမေက ငါးပိရည် ဓညှင်းသီးပြုတ် အပါအ၀င် အတို့အမြို့အစုံနဲ့ ပေါ့။ ကျန်တဲ့ဟင်းတွေတော့ မေ့ကုန်ပြီ။ ထမင်းစားတော့ ကျန်တဲ့အတို့ပဲ မိုးကောင်းသူတို့က စားပါတယ်။ အဲတော့ မေမေ ယောက်ခမကြီးက ဓညှင်းသီးပြုတ်လေး စီးမှစီး စားပါလား။ မစားတာလား။ ဘာလို့လဲပေါ့။ ဟုတ်ဆိုပြီး (လိုရင်းကို ခပ်တိုတိုပဲ)........... မစားတာလို့ပြောလိုက်တယ်။ အဲတော့ ကိုယ်တော်ကြီးက ကြားထဲကနေ မေမေ့ချွေးမက နည်းလို့မစားတာလို့ပြောလေရဲ့။ အမယ်လေး မနည်းဘူး ၁၀ လုံး ကြီးများတောင် ၀ယ်ထားတာဆိုတော့ မိုးကောင်းသူ ကျွန်မလဲ ရယ်ပြီးတာ နေလိုက်တယ်။ အဲဒီတော့ ကိုယ်တော်ကြီးက သူတို့အိမ်မှာက ဓညှင်းသီးကို အလုံး ၁၀၀၊ ၂၀၀ လောက်ကို တနေ့တည်း ပြုတ်စားတာ။ အမေ့ ၁၀လုံးလောက်တော့ မစားသေးဘူးလို့ ကြားထဲကနေ ဖြေလေရဲ့။ ဟုတ်တယ်လေ နည်းနည်းစားလဲ ပါးစပ်နံတဲ့အတူတူ (ဟိုနံ ဒီနံ...........) အခါတည်း များများစားပြီး နံတာကမှ တော်သေးတယ်လေ။ အိမ်မှာက ဓညှင်းသီးကို နည်းနည်းဆို မစားဘူး။ တခါတည်း များများပြုတ်စားလိုက်တယ်။ ဓညှင်းသီးကို ပြုတ်ရပြီဆိုတာနဲ့ ဆီနဲ့ဆားနဲ့ တို့ပြီးစားတာများပါတယ်။ ထမင်းနဲ့စားချင်လဲ စားပေါ့။ ကျွန်မတို့အိမ်မှာတော့ ဓညှင်းသီးကို ထမင်းနဲ့စားတာထက် ဒီအတိုင်းဆီနဲ့ဆားနဲ့တို့ စားတာပိုကြိုက်ပါတယ်။ အမေ့အိမ်ပြန်တုံးက ဓညှင်းသီး မပေါ်သေးလို့ မစားခဲ့ရဘူး။ ခုတော့ ပင်နီဆိုလာကနေပဲ ၀ယ်စားလိုက်တော့တယ်။ အလုံး ၁၀၀၊ ၂၀၀ တော့ မဟုတ်ဘူးပေါ့။ ဒီနေ့တော့ အလုံး ၅၀ ပဲ ပြုတ်စားလိုက်တယ်။ ကယ်.......... ဓညှင်းသီးကြိုက်သူများ အားမနာတမ်းကို ဆီနဲ့ဆားနဲ့ တို့စားသွားပါအုံးလား။ အဟီး ......... စားပြီးမှ ဆီးအောင့်တယ်လဲ မပြောနဲ့နော်။ ပြီး ရေများများသာ သောက်ပေတော့။



ဓညှင်းသီးပြုတ် ရပြီဆိုတာနဲ့ ဆီနဲ့ဆားနဲ့တို့ဆားလိုက်ပါတယ်။ (အကျင့်မကောင်းဘူးပဲပြောပြော ဘယ်လိုပဲပြောကြပါစေ ဒီဓညှင်းသီးပြုတ်တစ်ပန်းကိုတော့ ဘယ်သူကိုမှ မကျွေး မိုးကောင်းသူ တစ်ယောက်တည်း တစ်ထိုင်တည်းနဲ့ စားပလိုက်တယ်။)



ခလယ်က အဆံလေးတွေတော့ ဖယ်ပြီးစားပါတယ်။ အဲဒီ အဆံလေးတွေ ဖယ်စားရင် ဆီးမအောင့်ဘူးဆိုလား။



ဝယ်လာတာကို အခွံခွာထားပါပြီ။ ပြုတ်ရန် အဆင်သင့်ဖြစ်နေပါပြီ။



ဓညှင်းသီးပြုတ်ကို ညနေတော့ ထမင်းနဲ့ စားလိုက်ပါတယ်။ (ငါးပိရည်ရယ်၊ ပုဇွန်ငပွကြော်ရယ်၊ ငါးကြော်ရယ်၊ ဓညှင်းသီးပြုတ်ရယ်၊ ချဉ်ဟင်းရယ် စားလိုက်ပါတယ်။ ချဉ်ဟင်းတော့ ဘယ်နေမှန်းမသိလိုက်ဘူး။ ပုံထဲ မပါတော့ဘူး။ စိတ်မှန်းနဲ့တာ စားသွားတော့နော်)


ငါးကြော် ကျွတ်ကျွတ်လေး (ငါးနာမည်တော့ မသိဘူးနော့်)


နောက်နေ့မှ ဓညှင်းသီးပြုတ်နည်း ရေးပေးတော့မည်။ အတော်ကြီးနောက်ကျနေပြီမို့ အိပ်ပြီကွယ်။

ငါးခေါင်းဟင်း (Curry Fish Head )

ထမင်းအိုးဘလော့လေးလဲ ဟင်းအသစ်မတင်ဖြစ်တာ တော်တော်ကြာသွားပြီ။ အလုပ်များနေတာရော အပျင်းကြီးနေတာရော နဲ့ ဘာဟင်းမှ အသစ်မတင်ဖြစ်ဘူး။ အပျင်းကြီးနေတာက များနေတာပါလေ။ မိုးကောင်းသူကိုကော မှတ်မိကြပါအုံးမလားမသိဘူး။ လာလည်သူတွေလဲ အသစ်မရှိဘဲ ပြန်ပြန်သွားရတာ တကယ်ကြီးကို အားနာပါတယ်ရှင်။ လာလည်သူအားလုံးကိုလဲ အထူးကျေးဇူးတင်ပါတယ်။ ဒီနေ့တော့ ငါးခေါင်းဟင်းရည်ချက်ကို တင်လိုက်ပါတယ်ရှင်။ အားမနာတမ်းသုံးဆောင်သွားပါအုံးနော်။



ငါးခေါင်းဟင်း ချိုချဉ်စပ်လေး သုံးဆောင်သွားပါအုံးလား။


ငါးခေါင်းဟင်းအတွက် လိုအပ်သောအရာ

ငါးခေါင်း တစ်ခြမ်း
ကြက်သွန်နီ ၂ လုံး (ပါးပါးလှီးထားပါ)
ကြက်သွန်ဖြူ ၇ တက် (ထောင်းထားပါ)
ခရမ်းချဉ်သီး ၂ လုံး (လေးစိတ်ခြမ်းထားပါ)
ခရမ်းသီး ၂ လုံး (အနေတော် တုံးထားပါ)
ရုံးပတေသီး ၇ ချောင်း (နှစ်ပိုင်း ပိုင်းထားပါ)
ငရုပ်သီးစိမ်း ၁၀ တောင့်
ပြင်းတော်သိမ်ရွက်
မကျည်းမှည့် ကွမ်းသီးလုံးလောက် (အရည်ဖျော်ထားပါ)
ငါးခေါင်းဟင်း အနှစ်ထုပ် ၁ ထုပ် (ကျွန်မကတော့ ဈေးထဲက ကုလားဆိုင်ကနေ ငါးခေါင်းဟင်းချက်ချင်လို့ စပ်ပေးပါလို့ ပြောပြီးဝယ်ခဲ့တယ်။ ရယ်ဒီမိတ်ထုပ်ထက် ကုလားဆိုင်ကစပ်ပေးတာက ပိုကောင်းပါတယ်။ကိုယ်လိုချင်တာကို လိုတိုးပိုလျှော့လုပ်လို့လဲရတယ်။ ကျွန်မက စပ်စပ်လေးစာချင်တော့ ငရုတ်သီးအနှစ်များများထည့်ပေးပါလို့ ပြောလိုက်တယ်။ )


ငါးခေါင်းဟင်းချက်နည်း

ငါးခေါင်းကို ရေနဲ့သေချာစွာဆေးပါ။ ပြီး ဆား အချိုမှုန့်နဲ့ နယ်ထားပေးပါ။ ငါးခေါင်းဟင်းချက်မယ့်အိုးတည်ပါမယ်။ အိုးထဲသို့ ဆီအနည်းငယ်ထည့်ပါ။ ဆီကျက်ရင် ပါးပါးလှီးထားတဲ့ ကြက်သွန်နီ နဲ့ ထောင်းထားတဲ့ ကြက်သွန်ဖြူကို အရင် ဆီသတ်လိုက်ပါတယ်။ အနီရောင်သန်းလာတဲ့အထိကြော်လိုက်ပါ။ ပြီး ပြင်းတော်သိမ်ရွက်ကို ရေဆေးပြီး ထည့်လိုက်ပါ။ သူ့ကို အရင် ဆီသတ်လိုက်တော့ အနံ့ကပိုပြီးမွှေးပါတယ်။ ပြီး ငါးခေါင်းဟင်း အနှစ်ထုပ်ကို ထည့်လိုက်ပါ။ ၃ မိနစ်လောက် ဆီသတ်ပြီးရင် ငံပြာရည်ထည့်၊ ရေနွေးအနည်းငယ်ထည့်လိုက်ပါ။ ဆူနေအောင်တည်လိုက်ပါ။ ပြီး ဖျော်ထားတဲ့ မကျည်းမှည့် အရည်ကိုထည့်ပါ။ ဆူနေအောင်တည်လိုက်ပါ။ ဆူလာရင် ငါးခေါင်းကိုထည့်ပါ။ ဆူလာအောင်တည်ပါ။ ဆူလာရင် လှီးဖြတ်ထားတဲ့ ခရမ်းချဉ်သီး၊ ခရမ်းသီး၊ ရုံးပတေသီး နဲ့ ငရုတ်သီးကိုထည့်ပြီး ၁၀ မိနစ်လောက်တည်ထားပါ။ ဒါဆိုရင်တော့ ငါးခေါင်းဟင်း(ခေါ်) Curry fish head ရပါပြီရှင်။ အားမနာတမ်း သုံးဆောင်သွားပါအုံးနော်။