မိုးကောင်း မျှစ်ချဉ်ခေါက်ဆွဲ

ကျွန်မရဲ့အစ်ကိုတော်လဲ ဒီရောက်နေလို့ မိုးကောင်း မျှစ်ချဉ်ခေါက်ဆွဲလေး ချက်စားလိုက်ပါတယ်။ မြန်မာ အစားအစာ တော်တော်များများကိုတော့ ဒီမှာ ၀ယ်စားလို့ရပါတယ်။ ဒီခေါက်ဆွဲကိုတော့ အမေ့အိမ် (သို့) ကချင်ပြည်နယ်ထိ ပြန်မှသာလျှင်စားနိုင်ပါတယ်။ အဲဒီတော့ အစ်ကိုတော်ကို မျှစ်ချဉ်ခေါက်ဆွဲလေးလုပ်ကျွေးလိုက်ပါတယ်။ ကချင်ပြည်နယ် မျှစ်ချဉ်ခေါက်ဆွဲမှာ ထည့်တဲ့အစာပလာတွေကတော့ နည်းနည်းကွဲပြားတာချင်းရှိပါတယ်။ တချို့က တိုပန်ကျန် (ခေါ်) တရုတ်ပဲငါးပိအစား ဆီတိုပူးဟင်းချက်၊ ခရမ်းချဉ်သီးအနှစ်ချက် ထည့်စားတာလဲ ရှိပါတယ်။ အိမ်မှာတော့ တိုပန်ကျန်ပဲထည့်စားလေ့ရှိလို့ ကျွန်မလဲ အိမ်မှာစားတဲ့ အတိုင်းချက်စားလိုက်ပါတယ်နော်။ အိမ်မှာတော့ မျှစ်ချဉ်ကိုများများပြုတ်တယ်။ ခေါက်ဆွဲတစ်ပန်းကန် မျှစ်ချဥြ်ပုတ်တစ်ပန်း အဲလိုစားကြတာ။ ဒီလိုလေး လုပ်စားကြည့်ပါလား။ ၀က်သား၊ ကြက်သားတော့ မပါဘူးနော်။




မိုးကောင်းမျှစ်ချဉ်ခေါက်ဆွဲ သုံးဆောင်သွားပါအုံးလား။ ကုလားဗရာကြော်နဲ့စားပါတယ်။ ကျန်တဲ့အကြော်ထဲ့စားလဲရတယ်နော်။


တူမပါလို့ ပြန်တင်ထားတယ်နော်။ တူနဲ့နယ်စားပါရှင်။



ကုလားဗရာကြော်၊ မျှစ်ချဉ်ကို ပင်စိမ်းရွက်ထည့်ပြုတ်ထားတယ်၊ ပဲကျက်မှုန့်၊ ဟင်းဗျစ် (ခေါ်) တိုပူးနွေးကျဲကျဲ၊ နံနံပင်၊ ဆီကျက် နီနီ၊ ငရုတ်သီးအမှုန့်ကြော်၊ တိုပန်ကျန် (ခေါ်) တရုတ်ပဲငါးပိ၊ နံနံပင်၊ ပဲပင်ပေါက်ပြတ် နဲ့ ဘေဘီမုန့်ညှင်းပြုတ်



ဒီနေ့လဲ ခုံမလောက်လို့ အောက်ဆင်းစားကြတယ်ကွယ်။ စားပွဲဝိုင်းလေးတော့ လိုနေပြီ။ (မင်းသားတို့လင်မယားရယ်၊ အကိုတော်ရယ်၊ လူဆိုးရယ်၊ ကျွန်မတို့ လင်မယားရယ်။ မင်းသားတို့အိမ် နဲ့ အခုအိမ်အသစ်နဲ့ ကနီးတော့ တစ်ခုခုချက်တိုင်းလှမ်းခေါ်လိုက်တယ်။ လမ်းလျှောက်လာရင်ရတယ်လေ။ လာလဲမင်းသားကြီးပဲချက်တာများတယ်။ လူဆိုးတော့ အိမ်ပေါ်ရောက်နေပါပြီကွယ်။ တတ်နိုင်ဘူး ) အပေါ်မှာ မပါတာ တွေက ဆား၊ အချိုမှုန့်၊ ဆီကျက်ဝါ၀ါ၊ မုန့်ညှင်းချဉ်၊ ဟင်းရည်ပန်းကန်၊ ပြင်ထားတဲ့ခေါက်ဆွဲ တစ်ပန်းကန်



ကိုယ်တိုင်ကြော် ကုလားဗရာကြော်ပါ။ ငရုတ်သီးစိမ်းလေးပါထည့်ကြော်ထားတယ်။



မျှစ်ချဉ်ပြုတ် (၂ ကျပ်ဖိုး ဒါပဲရတယ်ကွယ်)


ပဲပင်ပေါက်ပြုတ် နဲ့ ဘေဘီမုန့်ညှင်းပြုတ် ( ပဲရွက်လေးပါ ထည့်ရင်ပိုကောင်းတယ်)



ဒီနေ့က ငါးဟင်းရည် ရိုးရိုး။ (ဆီတိုပူးထည့်ချက်တဲ့ ဟင်းရည်လဲ ချက်တတ်သေးတယ်နော်)


ဆန်စီးခေါက်ဆွဲခြောက်ကို ၁ နာရီလောက် ရေစိမ်ထားပါတယ်။

လိုအပ်သောစာရင်း
၁။ ဆန်ဆီးခေါက်ဆွဲ ၁ ပိသာ
၂။ ငါးကြင်း ၂၅ ကျပ်သား (ကျွန်မတော့ ငါးကြင်းနဲ့တူတဲ့ ငါးဝယ်ခဲ့တာပဲ။ Toman ဆိုလားပဲ)
၃။ ကြက်သွန်နီ၊ ကြက်သွန်ဖြူ၊ ဂျင်း
၎။ မြန်မာနံနံ၊ ရှမ်းနံနံ
၅။ မျှစ်ချဉ်(သေးသေးပါးပါးလှီးထားသော) ၁၅ ကျပ်သား (သို့) ရှမ်းချဉ်
၆။ ပဲပင်ပေါက်(သို့) ပဲရွက် (သို့) ဘေဘီမုန့်ညင်း (မကြိုက်လို့ မထည့်လဲ ရပါတယ်)
၇။ ပဲမုန့်စိမ်း
၈။ ကုလားဗရာကြော် (မိမိကြိုက်နှစ်သက်ရာ အကြော်စုံထည့်စားနိုင်ပါတယ်)


ခေါက်ဆွဲဟင်းရည်ပြုလုပ်ပုံ

ခေါက်ဆွဲဟင်းရည်အတွက် ရေနွေးအိုးတည်ထားပါ။
ငါးကြင်းကို ရေဆေးပြီး ဆား၊ အချိုမှုန့် အနည်းငယ်ထည့်နယ်ပြီး ၁၅ မိနစ်လောက် နပ်ထားပါ။
ပြီးရင် ငါးကြင်းကို မီးသွေးမီးနဲ့ကင်ပါ။ မီးဖြည်းဖြည်းနဲ့ကင်ပေးပါ။ ၁၀ မိနစ်၊ ၁၅ မိနစ်လောက်ဆို ရပါပြီ။ မီးသွေးမီး မရှိလဲ ဆီနည်းနည်းနဲ့ ကြော်ပေးပါ။ မီးကင်တာကတော့ ပိုပြီးမွှေးတာပေါ့။ ငါးကျက်ပြီဆိုရင် အအေးခံထားပြီး အရိုးနွင်ပါ။ ပြီးရင် ဟင်းရည်းအိုးလုပ်မယ့်အိုးထဲသို့ အရိုးနွင်ထားသော ငါးကြင်း၊ ကြက်သွန်နီ လေးခြမ်းစိတ် ၇ လုံး ကြက်သွန်ဖြူ တမွှာကို ဓားနဲ့ရိုက်ပြား၊ ဂျင်းလက် ၃ တစ်လောက်ကိုလဲ ဓားရိုက်ပြားပြီး ထည့်ပါ။ ဆား၊ အချို့မုန့် ထည့်ပါ။ ရေနွေးထည့်ပြီး ဆူအောင်ထည်ထားပါလေ။ ဟင်းရည်အိုးဆူလာလျှင်စတင် စားသုံးနိုင်ပါပြီ။


ခေါက်ဆွဲနဲ့တွဲဖက်စားမည့်မျှစ်ချဉ်ပြုတ်လုပ်နည်း

မျှစ်ချဉ်ကို ဆား၊ အချိုမုန့်၊ ဆနွင်း အနည်းငယ်၊ ရေထည့်ပြီး မိနစ် ၃၀ လောက်ရေခမ်းအောင်ပြုတ်ထားပါလေ။ ကြိုက်တတ်လျှင် ရှမ်းနံနံ (သို့) ပင်စိမ်းကို ရေခမ်းခါနီးထည့်အုပ်နိုင်ပါတယ်။

ထည့်စားရမည့် အစာပလာများ

ကြက်သွန်ဖြူ ဆီချက် ဆနွင်းနဲ့ဝါ၀ါချက်ထားပါ။
ငရုတ်ဆီ ဆီချက် နီနီ ချက်ထားပါ။
ပဲမုန့်ကို ရေဖျော်ပြီး ဆား၊ အချိုမုန့်၊ ဆနွင်း အနည်းငယ်ထည့်ပြီး တိုးပူးနွေး ကျိုသလို မပျစ်မကျဲကျိုပါ။
ပဲပင်ပေါက်(သို့) ပဲရွက် (သို့) ဘေဘီမုန့်ညင်း တို့ကို ရေနွေးဖျောထားပါ။
နံနံပင်ကို ပါးပါးလှီးထားပါ။

ရှမ်းခေါက်ဆွဲပြင်ဆင်ပုံ

ဆန်ဆီးခေါက်ဆွဲကို ပြုတ်ပါ။
စားမည့်ပန်ကန်လုံးထဲသို့ ပြုတ်ထားသော ဆန်ဆီးခေါက်ဆွဲထည့်၊ ကျိုထားသော ဟင်ဗျစ်(ခေါ်)တိုပူးကျဲကျဲ ၁ဇွန်းလောက်ထည့်၊ ရေဖျောထားသော ပဲပင်ပေါက်(သို့) ပဲရွက် (သို့) ဘေဘီမုန့်ညင်းထည့်၊ တိုပန်ကျန် (ခေါ်) တရုတ်ပဲငါးပိထည့်(ဆားကတော့ လိုမှထည့်တော့နော်)၊ အချိုမှုန့်ထည့်၊ ဆီကျက် နီနီထည့်၊ ဆီကျက် ၀ါဝါထည့်၊ နံနံပင်ထည့်၊ ကုလားဗရာကြော်ကိုချေပြီးထည့်၊ ပြုတ်ထားသော မျှစ်ချဉ်နဲ့တွဲပြီး စားသုံးနိုင်ပါပြီ။ ဒါကတော့ အသုပ်စားတဲ့နည်းပါ။ အရည်နဲ့စားချင်ရင် ငါးဟင်းရည်ထည့် စားလိုက်ရင် အရည်နဲ့ရပါပြီ။