ဒီနေ့ဟင်း

ဒီနေ့လဲ ဟင်းတွေက အခြောက်ပဲ။ စိုစိုဖတ်ဖတ်ပါဘူး။ နောက်နေ့တော့ ပါပါမယ်နော်။


အားမနားတမ်း သုံးဆောင်သွားပါအုံးလား။ ဒီနေ့လဲ အရည်ပါဘူး။ အရည်ဓာတ်မကျဘူးဖြစ်နေတယ်။ ကိုယ်ဓာတ်ကျတဲ့ဟင်းပဲ ချက်လိုက်တယ်။ ဟီးဟီး



ငါးကြော် (ငါးအရောင်က နည်းနည်းနီသလိုလို၊ ပန်းရောင်ပဲသန်းသလိုလို ငါးပဲ။ နာမည်သိဘူး။ ကြော်စား ၊ ချက်စား၊ ကြော်ချက်လေးလုပ်စား ကောင်းတယ်။ ဆား၊ အချိုမှုန့်၊ ဆနွင်းထည့်ပြီး ကြော်လိုက်ပါတယ်။)


ပဲပုတ်ကိုကြော်ချက်လုပ်ထားပါတယ်။ ဒါက ကိုယ်တော်ကြီးအကြိုက်။ ကျွန်မတော့ နည်းနည်းပဲ စားလိုက်တယ်။
(Knife တံဆိပ်နဲ့ဗူးကိုဝယ်ခဲ့ပါတယ်။ အရည်တွေကို သွန်လိုက်တယ်။ အရည်ပါထည့်ချက်ရင် အရမ်းကြီးငန်လို့ပါ။ အငန်ကြိုက်လဲအရည်ပါထည့်ချက်နော်။ ကျွန်မကတော့ ပါတဲ့အရည်ကို သွန်ပြီး ပဲပုတ်လေးတွေကိုပဲချက်လိုက်ပါတယ်။ ချက်နည်းကတော့ .......... ကြော်မယ့်အိုးထဲသို့ ဆီနည်းနည်းထည့်ပါ။ ဆီကျက်လာရင် ကြက်သွန်ဖြူ ၃ တက်လောက်ထောင်းထည့်လိုက်ပါ။ ကြက်သွန်ဖြူ နည်းနည်းအိအောင်ကြော်လိုက်ပါ။ ပြီးရင် ဆနွင်းနည်းနည်းထည့် ၊ ပဲပုတ်ထည့် ၊ အချိုမှုန့်ထည့်ပြီး ကြော်လိုက်ပါတယ်။ (ဆားတော့ ထပ်မထည့်နဲ့တော့နော်) ၅ မိနစ် ၊ ၇ မိနစ်လောက်ဆိုရပါပြီ။ ငရုတ်သီးစိမ်းကြိုက်တတ်ရင်တော့ မီးဖိုပေါ်ကနေချခါးနီးထည့်လိုက်နော်။ ပင်စိမ်းရွက်လေးရှိလဲ ထည့်ပြီးအုပ်လိုက်ပါ။ ကျွန်မမှာတော့ မရှိလို့ ထည့်မအုပ်လိုက်ဘူး။

အိမ်မှာတော့ စမွတ်လို့ခေါ်လားမသိဘူး။ အဲဒီအရွက်အမွှေးအကြိုင်လဲထည့်တတ်တယ်။ ပဲပုတ်ကလဲတက် ၊ စမွတ်ကလဲတက်နဲ့ သွေးတိုးရှိရင်တော့ သတိထားနော်။



ကျန်မဆိုင်လား။ ကြံမဆိုင်လား။ ဘယ်လိုခေါ်လဲသိဘူး။ ကြံမဆိုင်သုပ် (ကြံမဆိုင်ကို ၁၀မိနစ်လောက် ရေစိမ်ထားလိုက်တယ်။ ဆားထွက်သွားအောင်လို့။ ပြီးရေဆေး၊ ပါးပါးလှီး၊ အချိုမှုန့်နည်းနည်းထည့်၊ ဆီစိမ်းနည်းနည်းထည့်၊ ငရုတ်သီးစိမ်းပါးပါးလှီးထည့်ပြီး သုပ်ထားပါတယ်)

ကြံမဆိုင်ကို သုပ်စား၊ အသားနဲ့ကြော်စား၊ ငါးနဲ့ပေါင်းစား၊ ၀က်ရိုးနဲ့ကြက်ရိုးနဲ့ ဟင်းရည်သောက်လုပ်စားလို့ကောင်းပါတယ်။


မက်မွန်သီး ချိုချိုအေးအေးလေး။ ချဉ်ရင်တော့ ငံပြာရည်နဲ့ငရုတ်သီးအကျက်မှုန့်နဲ့သုပ်စားမလို့ဘဲ။ ချိုတော့ ဒီအတိုင်းစားလိုက်တယ်။ (ကိုယ်တော်ကြီး ပြန်ရောက်လာရင် အဆင်သင့်ဖြစ်အောင်ဆိုပြီး ကြိုတင်လှီးထားတယ်။ ပြီးဗူးထဲထည့် ၊ ရေခဲသေတ္တာထဲထည့်ထားလိုက်တာ မည်းကုန်ပါပြီတော်။ တတ်နိုင်ဘူး ဒါလေးပဲ သုံးဆောင်သွားပါအုံးနော်။)